23 чэрвеня, Мінск /Кар. БЕЛТА/. Штодзённы аб'ём вытворчасці электраэнергіі першым энергаблокам БелАЭС складае каля 27-27,5 млн кВт.гадз пры агульным аб'ёме вытворчасці ў энергасістэме каля 95 млн кВт.гадз. Аб гэтым паведаміў сёння міністр энергетыкі Віктар Каранкевіч на сустрэчы з працоўным калектывам філіяла "Мінская ЦЭЦ-4" РУП "Мінскэнерга", паведамілі БЕЛТА ў прэс-службе Мінэнерга.
Штодзённы аб'ём вырабленай электрычнай энергіі першым энергаблокам БелАЭС вышэйшы, чым аб'ём вытворчасці ў дзень чатырма энергасістэмамі: Магілёўскай, Мінскай, Гомельскай і Гродзенскай разам узятых. "Але гэта не значыць, што ідзе замяшчэнне вытворчасці электраэнергіі, якая выпрацоўваецца ЦЭЦ. БелАЭС выконвае ў аб'яднанай энергасістэме сваю функцыю, а станцыі, размешчаныя ў абласных энергасістэмах, забяспечваюць вытворчасць у асноўным цеплавой энергіі для патрэб ацяплення і гарачага водазабеспячэння буйных населеных пунктаў і, адпаведна, вытворчасць электраэнергіі па цеплафікацыйным цыкле", - адзначыў Віктар Каранкевіч.
У цэлым з моманту ўключэння ў аб'яднаную энергасістэму першым энергаблокам БелАЭС выпрацавана амаль 3,2 млрд кВт.гадз электраэнергіі. Гэта практычна палова гадавога аб'ёму спажывання электраэнергіі насельніцтвам краіны.
Увод двух энергаблокаў БелАЭС дасць магчымасць істотна знізіць залежнасць Беларусі ад вуглевадароднага паліва. "АЭС дазволіць замяшчаць каля 4,5 млрд куб.м прыроднага газу ў год пры штогадовым аб'ёме яго імпарту ў сярэднім на ўзроўні каля 20 млрд куб.м, - адзначыў міністр. - Эканомія на імпарце прыроднага газу складзе каля $550 млн у год".
Кіраўнік Мінэнерга праінфармаваў аб праведзенай рабоце па інтэграцыі БелАЭС у энергасістэму краіны. У прыватнасці, рэалізаваны маштабны праект па будаўніцтве высакавольтных электрасетак агульнай працягласцю 1,6 тыс. км, мадэрнізаваны чатыры сістэмаўтваральныя падстанцыі, уведзена ў эксплуатацыю высокатэхналагічная падстанцыя 330 кВ "Паставы". Гэта дало магчымасць пастаўляць электраэнергію з АЭС у любы рэгіён краіны. Акрамя таго, на 20 энергааб'ектах уведзены ў строй сучасныя электракатлы сумарнай магутнасцю 916 МВт. "Яны былі задзейнічаны ў рэгуляванні сутачнага графіка нагрузак у ацяпляльны перыяд у першым квартале 2021 года", - расказаў Віктар Каранкевіч. У актыўнай стадыі рэалізацыі знаходзяцца праекты па будаўніцтве пікава-рэзервовых крыніц, якія дазволяць павысіць надзейнасць энергасістэмы.
"Нягледзячы на тое, што вялікую ўвагу мы ўдзяляем будаўніцтву АЭС, развіццю электрасеткавай інфраструктуры, не менш важнымі з'яўляюцца пытанні павышэння эфектыўнасці дзеючых аб'ектаў генерацыі, - дадаў міністр. - На такіх аб'ектах будзе арганізавана сістэмная і планамерная работа па замене абсталявання, павышэнні яго эфектыўнасці. Гэта закладзена ў нашай галіновай праграме".
На заканчэнне сустрэчы міністр адказаў на пытанні работнікаў станцыі, якія датычыліся рэалізацыі праекта па будаўніцтве БелАЭС, мадэрнізацыі ліній электраперадачы, далейшых перспектыў развіцця ЦЭЦ.
У час наведвання Мінскай ЦЭЦ-4 Віктару Каранкевічу далажылі, як рэалізуюцца праекты па рамонце будынкаў і збудаванняў, аптымізацыі вытворчых плошчаў і добраўпарадкаванні тэрыторыі станцыі з улікам даручэнняў, якія былі дадзены міністрам у час рабочай паездкі на ЦЭЦ-4 у ліпені мінулага года. Была адзначана станоўчая дынаміка. Аднак, паводле слоў кіраўніка Мінэнерга, выбудаваная сістэмная работа павінна быць прадоўжана ў першую чаргу для стварэння больш камфортных умоў працы на прадпрыемстве. Віктар Каранкевіч наведаў машынную залу, цэнтральны шчыт кіравання электрастанцыі, азнаёміўся з рэжымам работы ўстаноўленых на ЦЭЦ электракатлоў. Міністр таксама быў праінфармаваны аб выкананні работ па мадэрнізацыі энергаблока нумар 6 станцыі з заменай статара генератара, а таксама планах па ўкараненні аўтаматычнай сістэмы шарыкавай ачысткі кандэнсатара.-0-
