26 красавіка, Віцебск /Алеся Пушнякова - БЕЛТА/. На Пастаўскім малочным заводзе плануюць за 2021-2022 гады закупіць новае абсталяванне для вытворчасці тварагу і пашырыць сыравінную базу, паведаміў карэспандэнту БЕЛТА старшыня Пастаўскага райвыканкама Сяргей Чэпік.
"Інвестыцыйны праект па мадэрнізацыі Пастаўскага малочнага завода прадугледжвае закупку новага абсталявання для вытворчасці тварагу. Кошт праекта складзе каля Br4 млн. Яго рэалізацыя будзе праводзіцца на працягу 2021-2022 гадоў. Прадпрыемства працуе стабільна. Агульны аб'ём прадукцыі завода за I квартал 2021 года ў фактычных цэнах склаў Br29,5 млн. Перспектывы ў прадпрыемства ёсць", - адзначыў Сяргей Чэпік.
Ён таксама падкрэсліў, што для нарошчвання вытворчасці завода будуць развіваць у раёне сыравінную зону. Каля 70 працэнтаў затрат прадпрыемства складае закупка сыравіны, што закупляецца за межамі вобласці і за апошнія некалькі месяцаў падаражэла на 11 працэнтаў.
"Цяпер ідзе рэканструкцыя ААТ "Камайскі-Агра" пад малочнатаварную ферму (МТФ). Увесці яго ў строй плануем у бягучым годзе. Пачнём у наступным годзе яшчэ адзін аб'ект - ААТ "Сцяг Перамогі Агра", дзе пасля завяршэння будаўніцтва будзе размешчана каля 400 галоў буйной рагатай жывёлы. У ААТ "Кураполле-агра" будзе праведзена рэканструкцыя існуючых комплексаў пад развядзенне буйной рагатай жывёлы, яны таксама будуць дабудаваны ў 2022 годзе. Усе гэтыя прадпрыемствы ўваходзяць у аграпрамысловае аб'яднанне, створанае ў адпаведнасці з указам нумар 70 "Аб развіцці аграпрамысловага комплексу Віцебскай вобласці", цэнтрам якога з'яўляецца Пастаўскі малочны завод", - расказаў старшыня райвыканкама.
Паступова ўсе тры гаспадаркі ўвядуць у эксплуатацыю, і яны стануць сучаснымі МТФ. Малочны завод будзе выкарыстоўваць сыравіну гэтых прадпрыемстваў, каб зменшыць сабекошт выпускаемай прадукцыі і павялічыць яе вытворчасць.-0-
