12 лютага, Мінск /Кар. БЕЛТА/. Падтрыманне цэнавай стабільнасці і абарона ўнутранага рынку стануць прыярытэтнымі задачамі МАРГ на 2020 год. Аб гэтым сёння ішла размова на падагульняючай калегіі Міністэрства антыманапольнага рэгулявання і гандлю, перадае карэспандэнт БЕЛТА.
У прыватнасці, намеснік міністра Андрэй Картун нагадаў у сваім выступленні, што на гэты год пастаўлена мэта па інфляцыі ў памеры 5 працэнтаў. З улікам бягучай сітуацыі, перш за ўсё, уздзеяння знешніх фактараў, гэта задача няпростая. Паводле ацэнак МАРГ, толькі рэалізацыя падатковага манеўру можа абумовіць дадатковы прырост інфляцыі каля аднаго працэнтнага пункта.
"Трэба разумець, што запасу ў частцы цэн у нас больш няма. Таму неабходна як мінімум абмежаваць павышэнне любых цэн у краіне на ўзроўні тэмпаў базавай інфляцыі (г.зн. 4 працэнтаў), - адзначыў намеснік міністра. - Пры гэтым у выпадку адхілення ад мэтавага арыенціру мы будзем уводзіць больш строгія меры: цэнавае рэгуляванне і абмежаванне росту рэгулюемых цэн (не ў рамках запланаваных значэнняў, а аж да поўнага спынення росту цэн)".
У якасці дадатковых мер па абароне ўнутранага рынку і забеспячэння цэнавай стабільнасці было прапанавана адобрыць на сённяшняй калегіі пашырэнне пераліку дзеючых рэкамендаваных гандлёвых надбавак на сацыяльна значныя тавары, абмежаванне выплаты бонусаў па іх. Таксама МАРГ прапануе ўстанавіць узровень долі харчовых сацыяльна значных тавараў у продажы, што будзе забяспечваць захаванне індыкатара эканамічнай бяспекі рэспублікі, выключыць продажы беларускіх тавараў на знешнія рынкі па цэнах, ніжэйшых за ўнутраныя, і пашырыць пералік сацыяльна значных тавараў, цэны на якія могуць часова рэгулявацца МАРГ у мэтах абароны ўнутранага рынку.-0-
