7 кастрычніка, Мінск /Кар. БЕЛТА/. Падатковыя службы краін СНД развіваюць электронныя сэрвісы. Аб гэтым паведаміў сёння журналістам міністр па падатках і зборах Сяргей Налівайка перад пасяджэннем Каардынацыйнага савета кіраўнікоў падатковых службаў дзяржаў - удзельніц СНД, перадае карэспандэнт БЕЛТА.
"Традыцыйна такія сустрэчы кіраўнікоў падатковых службаў краін СНД праводзяцца для зверкі гадзіннікаў. Сёння асноўная тэма нашага мерапрыемства - гэта электронныя паслугі. Мы раскажам аб сваіх дасягненнях, аб тых электронных сэрвісах, якія мы прадастаўляем нашым плацельшчыкам. Паслухаем, што атрымалася ў калег, які вопыт можна пераняць. Наша задача - нарошчваць абмен інфармацыяй у падатковай сферы ў СНД", - сказаў Сяргей Налівайка.
Паводле яго слоў, сёння асноўны трэнд у падатковых службаў - гэта прэфайлінг, інакш кажучы, папярэдняе запаўненне дэкларацыі. "Улічваючы, што ў падатковых службаў ёсць вялікі масіў даных, вельмі магутны інфармацыйны рэсурс, на аснове гэтых даных і аналітыкі фарміруюцца дэкларацыі. Такім чынам, плацельшчык менш часу траціць на запаўненне дэкларацыі, скарачаецца колькасць памылак, якія ён можа зрабіць нават ненаўмысна. У нас актыўна развіваецца прэфайлінг у адносінах не толькі юрыдычных, але і фізічных асоб. Значыць, калі настае час запаўняць дэкларацыю па выніках года, нашы грамадзяне могуць зайсці на сайт падатковых органаў і шляхам адказаў на пытанні яе запаўняць. А потым трэба будзе толькі аплаціць", - адзначыў міністр.
На абмеркаванне каардынацыйнага савета вынесены пытанні павышэння якасці прадастаўляемых падатковых паслуг, ацэнка іх плацельшчыкамі, пошук новых інтэрактыўных паслуг для іх на аснове вопыту падатковых адміністрацый краін СНД, а таксама далейшыя перспектывы развіцця.-0-