Новыя металаапрацоўчыя станкі пачалі працаваць у адным з цэхаў БЕЛАЗа

29 студзеня, Мінск /Кар. БЕЛТА/. Чатыры сучасныя металаапрацоўчыя станкі ўкаранёны ў вытворчы працэс у рамках рэалізацыі інвестыцыйнай праграмы па мадэрнізацыі станочнага парку БЕЛАЗа, паведамілі БЕЛТА на прадпрыемстве.

Станкі ўведзены ў эксплуатацыю ў інструментальным цэху прадпрыемства замест ручнога металарэзнага абсталявання, якое планава выведзена з тэхналагічнага цыкла. У прэс-службе прадпрыемства падкрэслілі, што новае абсталяванне прызначана для апрацоўкі і вырабу інструменту і тэхналагічнай аснасткі, у прыватнасці, вырабаў складанай формы для прэс-форм, габарытаў станочных і зборачна-зварачных прыстасаванняў для пэўных дэталей машын і інш.

Металаапрацоўчыя станкі з'яўляюцца важнай часткай сучаснай аўтаматызацыі - ключавой умовы забеспячэння стабільна высокай якасці вырабаў і хуткасці вытворчых аперацый. "Рэалізацыя праектаў тэхналагічнага перааснашчэння ў цэхах як асноўнай, так і дапаможнай вытворчасці БЕЛАЗа садзейнічае нарошчванню магутнасцей, павышэнню прадукцыйнасці і якасці прадукцыі, зніжае працаёмкасць і сабекошт вырабу дэталей, павялічвае эфектыўнасць вытворчых працэсаў", - адзначылі на БЕЛАЗе.-0-