19 студзеня, Масква /Эдуард Півавар - БЕЛТА/. Афіцыйны прадстаўнік Еўразійскай эканамічнай камісіі Ія Малкіна сёння на брыфінгу расказала аб рызыках для эканомік краін Еўразійскага эканамічнага саюза, якія прагназуе ЕЭК, перадае карэспандэнт БЕЛТА.
"Хоць эканомікі ЕАЭС даволі актыўна аднаўляліся ў мінулым годзе і выйшлі на дапандэмійны ўзровень, у бягучым годзе эксперты камісіі прагназуюць запаволенне росту. Чакаецца, што прырост ВУП ЕАЭС у 2022 годзе складзе 3,1 працэнта, - сказала Ія Малкіна. - Па-першае, у камісіі ацэньваюць як высокую рызыку захавання нізкіх тэмпаў эканамічнага росту ў дзяржавах ЕАЭС. Гэта стане вынікам завяршэння аднаўленчага росту, паступовага скарачэння стымулюючых мер бюджэтна-падатковай палітыкі і ўзмацнення грашова-крэдытнай палітыкі. Акрамя таго, неабходна адзначыць нізкі ўзровень інвестыцыйнай актыўнасці, што негатыўна паўплывае на эканамічны рост у сярэднетэрміновым перыядзе. У доўгатэрміновым перыядзе негатыўны ўплыў на эканамічны рост у Беларусі і Расіі будзе аказваць таксама пагаршэнне дэмаграфічнай сітуацыі".
Паводле яе слоў, для ўсіх дзяржаў ЕАЭС застаюцца высокімі інфляцыйныя рызыкі ў сувязі з ростам сусветных цэн на харчовыя тавары і сыравіну, пралангацыяй дзеяння стымулюючых фіскальных мер і аслабленнем курсаў нацыянальных валют. "Па выніках 2021 года сярэднегадавая інфляцыя ў краінах ЕАЭС ацэньваецца на ўзроўні 6,1 працэнта, у 2022 годзе чакаецца яе зніжэнне да 4,5 працэнта. Для параўнання: у 2020 годзе інфляцыя склала 3,9 працэнта", - адзначыла прадстаўнік ЕЭК.
"Даволі высокія для ЕАЭС і такія глабальныя рызыкі, як новыя хвалі распаўсюджвання COVID-19, а таксама магчымыя ўзрушэнні на сусветных фінансавых рынках у сувязі з узмацненнем грашова-крэдытнай палітыкі вядучымі краінамі свету", - падкрэсліла Ія Малкіна.-0-
