Новыя гандлёвыя пагадненні і зніжэнне пошлін на сыравіну для "кандытаркі". Пяткевіч аб выніках Савета ЕЭК

30 студзеня, Масква /Эдуард Півавар - БЕЛТА/. Савет Еўразійскай эканамічнай камісіі (ЕЭК) пачаў выкананне дарожнай карты па рэалізацыі Дэкларацыі аб далейшым развіцці эканамічных працэсаў у рамках Еўразійскага эканамічнага саюза да 2030 года і на перыяд да 2045 года "Еўразійскі эканамічны шлях", якая была зацверджана ў мінулым годзе ў перыяд старшынства Беларусі ў органах ЕАЭС. Аб гэтым паведаміла журналістам віцэ-прэм'ер Беларусі Наталля Пяткевіч па выніках пасяджэння Савета ЕЭК, якое адбылося 30 студзеня ў Маскве, паведамляе карэспандэнт БЕЛТА.

Наталля Пяткевіч нагадала, што ў перыяд беларускага старшынства былі вызначаны асновы для далейшага пашырэння работы ЕАЭС на знешнім контуры. "Сёння мы зацвердзілі пул тых краін, з якімі ЕАЭС пачынае перагаворы па прэферэнцыйным гандлёвым рэжыме, стварэнні зон свабоднага гандлю. Мы зацвердзілі першачарговыя краіны, з якімі пачнуць весці перагаворы: гэта Зімбабвэ, Іарданія, Пакістан і ПАР", - паведаміла яна.

Савет ЕЭК падтрымаў таксама шэраг беларускіх ініцыятыў па зніжэнні або абнуленні ўвазных мытных пошлін на некаторыя сыравінныя тавары. "Якія маюць для нас важнае значэнне з пункту гледжання патаннення пры вытворчасці тых ці іншых беларускіх тавараў, зніжэння іх сабекошту або (датычацца. - Заўвага БЕЛТА) паставак нейкіх тавараў, у якіх ёсць недахоп, або якія мы не вырабляем, - растлумачыла віцэ-прэм'ер. - У якасці прыкладу - гэта зярняты какавы, какававы тлушч, какававы алей, што неабходна для нашай "кандытаркі".

Наталля Пяткевіч таксама звярнула ўвагу, што ў ЕАЭС дзейнічае механізм фінансавай падтрымкі кааперацыйных праектаў у прамысловасці. "Сёння было прынята рашэнне аб тым, што гэта праграма будзе распаўсюджана і на праекты ў галіне АПК, што, увогуле, таксама заняло даволі працяглую працэдуру, пакуль усе ўзгаднілі ўсе пазіцыі. Але сёння мы гэта рашэнне прынялі", - дадала віцэ-прэм'ер.-0-