28 лістапада, Мінск /Кар. БЕЛТА/. У рамках рэалізацыі палажэнняў закона Беларусі ад 19 красавіка 2022 года нумар 164-З "Аб плацежных сістэмах і плацежных паслугах" Нацыянальным банкам зацверджаны правілы ажыццяўлення аперацый з электроннымі грашыма. Адпаведнае рашэнне прынята пастановай праўлення Нацыянальнага банка ад 16 верасня 2022 года нумар 350, якая ўступіла ў сілу з 25 лістапада, паведамілі БЕЛТА ў Нацбанку.
Законам прадугледжана магчымасць з'яўлення на рынку новых удзельнікаў (эмітэнтаў, агентаў па распаўсюджванні, абмене, пагашэнні электронных грошай, якія не з'яўляюцца фінансавымі арганізацыямі). Для іх правіламі канкрэтызаваны парадак правядзення аперацый з электроннымі грашыма. Правілы таксама ўдакладняюць паняційны апарат і ўстанаўліваюць парадак узаемадзеяння ўдзельнікаў электронных плацежных сістэм рэзідэнтаў і нерэзідэнтаў, трымальнікаў электронных грошай і ўдзельнікаў электронных плацежных сістэм, парадак набыцця і расходавання электронных грошай іх трымальнікамі. Акрамя таго, у правілах рэгламентаваны парадак ажыццяўлення эмісіі, распаўсюджвання, выкарыстання, абмену і пагашэння электронных грошай.
Раней удзельнікі рынку электронных грошай ажыццяўлялі сваю дзейнасць на тэрыторыі Беларусі ў адпаведнасці з патрабаваннямі пастановы праўлення Нацбанка ад 26 лістапада 2003 года нумар 201.
Новыя правілы ўлічваюць сфарміраваную практыку ажыццяўлення аперацый з электроннымі грашыма і будуць садзейнічаць развіццю названага сегмента і прыцягненню на плацежны рынак пастаўшчыкоў плацежных паслуг, якія не з'яўляюцца банкамі (нябанкаўскімі крэдытна-фінансавымі арганізацыямі).-0-
