6 красавіка, Мінск /Кар. БЕЛТА/. Нацыянальны банк вынес на грамадскае абмеркаванне праект указа "Аб бягучым (разліковым) банкаўскім рахунку фізічнай асобы з базавымі ўмовамі абслугоўвання", паведамляе БЕЛТА са спасылкай на Нацыянальны прававы інтэрнэт-партал.
У праекце адлюстраваны агульныя палажэнні, што характарызуюць асобныя пытанні, якія звязаны з функцыянаваннем базавага рахунку і патрабуюць замацавання на ўзроўні заканадаўчага акта.
У абгрунтаванні неабходнасці прыняцця гэтага дакумента гаворыцца, што з'яўленне ў лінейцы банкаўскіх прадуктаў такога прадукту, як бягучы (разліковы) банкаўскі рахунак фізічнай асобы з базавымі ўмовамі абслугоўвання, прызначана забяспечыць прадастаўленне мінімальнага набору бясплатных плацежных аперацый і стварыць умовы, якія даюць магчымасць фізічным асобам мінімізаваць расходы па найбольш запатрабаваных аперацыях. "Адначасова закладзеныя ў праекце падыходы да плацежнага абслугоўвання дадуць магчымасць забяспечыць ахову інтарэсаў слабаабароненых слаёў насельніцтва - пенсіянераў, студэнтаў, малазабяспечаных грамадзян і фізічных асоб са спецыфічным статусам", - адзначаюць распрацоўшчыкі праекта ўказа.
Таксама ў Нацбанку лічаць, што ўкараненне базавага рахунку ў практыку выкарыстання пашырыць магчымасці патэнцыяльнага кліента свабодна выбіраць банк для абслугоўвання, што прывядзе да вызвалення фізічных асоб ад неабходнасці адкрываць рахункі для атрымання заработнай платы і прыраўнаваных да яе выплат, стыпендый, у тым ліку надбавак да стыпендый і матэрыяльнай дапамогі навучэнцам, у канкрэтных банках, выбар якіх часта залежыць не ад жадання самога чалавека, а ад эканамічнай зацікаўленасці арганізацыі, якая названую выплату ажыццяўляе. "Такі падыход палепшыць абарону законных правоў і інтарэсаў спажыўцоў плацежных паслуг. Такім чынам, праект дакумента дасць магчымасць устанавіць на заканадаўчым узроўні базавы сацыяльны стандарт прадастаўлення бясплатных плацежных паслуг у банкаўскай сістэме краіны", - адзначаюць распрацоўшчыкі дакумента.
Пры гэтым у абгрунтаванні гаворыцца, што праект указа не ўстанаўлівае абмежаванні на адкрыццё фізічнымі асобамі рахункаў у банках, выплату заработнай платы на рахункі. Таксама дакумент не абмяжоўвае магчымасці людзей у выкарыстанні розных банкаўскіх прадуктаў і паслуг і атрыманні выплат сацыяльнага характару, стыпендый не праз банк.
Арганізатар публічнага абмеркавання праекта - Нацыянальны банк.
Свае заўвагі і прапановы можна выказаць у спецыяльнай тэме на Прававым форуме Беларусі з 6 па 16 красавіка.-0-
