21 красавіка, Мінск /Кар. БЕЛТА/. Нацыянальны банк растлумачыў змяненні па пытаннях валютнага рэгулявання і кантролю, паведамілі БЕЛТА ва ўпраўленні інфармацыі і грамадскіх сувязей Нацбанка.
Прэзідэнтам Беларусі падпісаны ўказ ад 20 красавіка 2021 года нумар 154, у адпаведнасці з якім з 9 ліпеня бягучага года прызнаюцца страціўшымі сілу ўказ ад 12 мая 2009 года нумар 240 "Аб некаторых пытаннях у галіне валютнага рэгулявання" і ўказ ад 31 ліпеня 2018 года нумар 301 "Аб адмене абавязковага продажу замежнай валюты". "Гэта рашэнне прынята для прывядзення заканадаўства ў галіне валютнага рэгулявання ў адпаведнасць з патрабаваннямі нарматворчасці, а таксама выключэння з яго норм, якія не адпавядаюць новай парадыгме правядзення аперацый з замежнай валютай у Беларусі, замацаванай палажэннямі новай рэдакцыі закона "Аб валютным рэгуляванні і валютным кантролі", што ўступае ў сілу з 9 ліпеня 2021 года і прадугледжвае адмену шэрага існуючых абмежаванняў і абцяжарванняў пры правядзенні валютных аперацый юрыдычнымі і фізічнымі асобамі", - адзначылі ў Нацбанку.
Так, з прызнаннем страціўшым сілу ўказа нумар 301, якім у жніўні 2018 года ў краіне быў фактычна адменены абавязковы продаж замежнай валюты, з заканадаўства Беларусі выключаюцца нормы, што рэгламентуюць парадак выкарыстання названага інструмента валютнага рэгулявання.
З прызнаннем страціўшым сілу ўказа нумар 240 адмяняецца раней прадастаўленае Нацыянальнаму банку права аднаасобна ўстанаўліваць дадатковыя патрабаванні да парадку правядзення рэзідэнтамі бягучых валютных аперацый, а таксама выключаюцца нормы, якія рэгламентуюць працэдуры прыняцця рашэнняў у сферы валютнага рэгулявання.-0-
