8 кастрычніка, Мінск /Кар. БЕЛТА/. На грамадскае абмеркаванне выносіцца праект закона "Аб змяненні законаў па пытаннях банкаўскай дзейнасці", які прадугледжвае карэкціроўку Банкаўскага кодэкса Беларусі, паведамілі БЕЛТА ва ўпраўленні інфармацыі і грамадскіх сувязей Нацыянальнага банка.
Праектам закона прапануецца змяніць парадак распрацоўкі і зацвярджэння асноўных напрамкаў грашова-крэдытнай палітыкі, удасканаліць прававы механізм забеспячэння фінансавай стабільнасці ў Беларусі, павысіць узровень прававой абароны спажыўцоў банкаўскіх паслуг, выключыць празмерную фінансавую нагрузку на крэдытаатрымальнікаў.
Законапраект прадугледжвае прыняцце мер для пераходу банкаў да прымянення міжнародных стандартаў фінансавай справаздачнасці, павышэнне эфектыўнасці банкаўскага нагляду і кантролю за выкананнем заканадаўства аб прадухіленні легалізацыі даходаў, атрыманых злачынным шляхам, узмацненне інфармацыйнай бяспекі банкаў.
Прыняцце закона дасць магчымасць абмежаваць даўгавую нагрузку на фізічных асоб і іншых крэдытаатрымальнікаў, узмацніць з улікам рызыка-арыентаванага падыходу кантроль за выкананнем банкамі заканадаўства аб прадухіленні легалізацыі даходаў, атрыманых злачынным шляхам, фінансавання тэрарыстычнай дзейнасці і фінансавання распаўсюджвання зброі масавага паражэння, павысіць эфектыўнасць прававога рэгулявання банкаўскіх адносін.
Арганізатар грамадскага абмеркавання - Нацыянальны банк. Заўвагі і прапановы могуць быць выказаны ў спецыяльнай тэме на Прававым форуме Беларусі з 8 па 21 кастрычніка.-0-
