4 снежня, Мінск /Кар. БЕЛТА/. Нацыянальны банк Беларусі не бачыць прычын для перагляду фармату ўзаемаадносін беларускіх банкаў з сістэмай SWIFT. Аб гэтым гаворыцца ў каментарыі прэс-службы Нацбанка, паведамляе БЕЛТА.
"Нацыянальны банк не бачыць якіх-небудзь аб'ектыўных прычын для перагляду існуючага фармату ўзаемаадносін беларускіх банкаў з сістэмай SWIFT і не лічыць высокай верагоднасць рэалізацыі гэтай рызыкі", - заявілі ў прэс-службе.
У Нацбанку звярнулі ўвагу, што некаторыя краіны выкарыстоўваюць SWIFT для перадачы фінансавых паведамленняў як для трансгранічных плацяжоў, так і для ўнутраных. У той жа час у Беларусі з 1999 года працуе ўнутраная сістэма перадачы фінансавай інфармацыі Нацбанка (СПФІ). Яна забяспечвае перадачу фінансавых паведамленняў, асноўнымі з якіх з'яўляюцца плацежныя дакументы ў беларускіх рублях. Аналагічная сістэма ёсць і ў Расіі - Сістэма перадачы фінансавых паведамленняў Банка Расіі (СПФП).
Усе плацяжы юрыдычных асоб (уключаючы налічэнне заработных плат, пенсій) на тэрыторыі Беларусі забяспечваюцца або ўнутры аднаго банка, калі плацельшчык і атрымальнік плацяжу з'яўляюцца кліентамі гэтага банка, або з выкарыстаннем аўтаматызаванай сістэмы міжбанкаўскіх разлікаў Нацбанка, адной з асноўных сістэм якой з'яўляецца СПФІ. "Гэта значыць, што плацяжы юрыдычных асоб на тэрыторыі нашай краіны не залежаць ад SWIFT", - растлумачылі ў Нацбанку.
Што датычыцца работы сістэмы безнаяўных разлікаў па рознічных плацяжах (а гэта ўсе картачныя сістэмы і сістэмы разлікаў з выкарыстаннем электронных грошай, правядзенне плацяжоў з іх выкарыстаннем, пераводы грашовых сродкаў паміж фізічнымі асобамі, аплата тавараў (работ, паслуг), у тым ліку анлайн), то работа гэтых сістэм не звязана са SWIFT і яны будуць функцыянаваць у штатным рэжыме нават пры ўзнікненні тых ці іншых праблем ва ўзаемадзеянні беларускіх банкаў з сістэмай SWIFT, растлумачылі ў Нацбанку. Гэта датычыцца і банкаўскіх плацежных картак, выпушчаных да рахункаў, валюта якіх адрозніваецца ад беларускага рубля.
У Нацбанку таксама адзначылі, што за межамі Беларусі можна разлічвацца банкаўскімі плацежнымі карткамі міжнародных плацежных сістэм у беларускіх рублях. Можна таксама выкарыстоўваць картку плацежнай сістэмы БЕЛКАРТ у краінах прысутнасці плацежнай сістэмы "Мір". Гэта Расія і іншыя краіны - удзельніцы ЕАЭС, Узбекістан, Балгарыя, Кіпр, Турцыя, Вялікабрытанія, ААЭ і Тайланд.
У прэс-службе праінфармавалі, што Нацбанк пастаянна працуе над пашырэннем магчымасцей доступу беларускіх банкаў да сучасных тэхналогій, якія зніжаюць трансакцыйныя выдаткі і павышаюць хуткасць ажыццяўлення плацяжоў, эфектыўнасць і ўстойлівасць работы ўсяго плацежнага рынку Беларусі.
"Расійская Федэрацыя з'яўляецца нашым асноўным гандлёвым партнёрам. Таму цэнтральнымі банкамі нашых краін было прынята рашэнне аб інтэграцыі ўнутраных сістэм па абмене фінансавай інфармацыяй, плацежных сістэм з выкарыстаннем банкаўскіх плацежных картак БЕЛКАРТ (РБ) і "Мір" (РФ), сістэмы імгненных плацяжоў Нацыянальнага банка і сістэмы хуткіх плацяжоў Банка Расіі", - адзначылі ў Нацбанку.
Інтэграцыя ўнутраных сістэм таксама прадугледжана ў рамках ЕАЭС.
Што датычыцца інтэграцыі СПФІ і СПФП, то, як растлумачылі ў Нацбанку, яна можа забяспечваць абмен фінансавымі паведамленнямі на тэрыторыі дзвюх краін аналагічна SWIFT. "У працэсе інтэграцыі сістэмы былі дапрацаваны для перадачы фінансавых паведамленняў паміж дзвюма краінамі па трансгранічных плацяжах у любой валюце. Таму ў выпадку, калі неабходна правесці разлікі паміж рэзідэнтамі Рэспублікі Беларусь і рэзідэнтамі Расійскай Федэрацыі, можна выкарыстоўваць як сістэму SWIFT, так і інтэграцыю ўнутраных сістэм краін", - сказалі ў Нацбанку.
Тэхнічным аператарам інтэграцыі сістэм з беларускага боку выступае Беларускі міжбанкаўскі разліковы цэнтр, які стварыў і з 29 лістапада 2019 года ўвёў у прамысловую эксплуатацыю сэрвіс-бюро. Гэта "адзіны пункт уваходу" банкаў Беларусі, які перадае і атрымлівае ад рэзідэнтаў РФ фінансавыя паведамленні ў фармаце SWIFT. Сэрвіс-бюро дадаткова дазваляе банкам і нябанкаўскім крэдытна-фінансавым арганізацыям захоўваць архіўныя паведамленні, кантраляваць іх фарматы, аказваць тэхнічную і кансультацыйную дапамогу.
"Сэрвіс-бюро таксама дапамагае беларускім банкам хутчэй укараняць новыя тэхналогіі і сэрвісы ў галіне трансгранічных разлікаў, павышаць сваю эфектыўнасць і канкурэнтаздольнасць. Сярод значных плюсаў - аптымізацыя расходаў і зніжэнне сабекошту шляхам раздзялення затрат, адмова ад уласнай ІТ-інфраструктуры і каналаў сувязі з банкамі-нерэзідэнтамі. Усё гэта садзейнічае павелічэнню аб'ёмаў апрацоўваемай інфармацыі і пашырэнню пераліку паслуг", - расказалі ў прэс-службе.
На гэты момант да сэрвіс-бюро падключыліся ўжо шэсць беларускіх банкаў: Белзнешэканамбанк, РРБ-Банк, Белгазпрамбанк, Банк ВТБ, БТА Банк, Ідэя Банк. У працэсе падключэння яшчэ 10 банкаў - Белаграпрамбанк, Банк гандлёвы капітал, Пріорбанк, Франсабанк, Цэптэр Банк, Белінвестбанк, Абсалютбанк, Беларусбанк, Банк Дабрабыт і Беларускі народны банк.
Сістэма SWIFT і інтэграцыя СПФІ і СПФП працуюць аўтаномна адна ад адной, таму можна быць падключаным да дзвюх сістэм адначасова.
"У выпадку неабходнасці разлікаў за тавары (работы, паслугі) юрыдычных асоб з партнёрамі ў іншых краінах існуюць магчымасці работы праз банкі-карэспандэнты. Таксама існуе магчымасць адкрыць карпаратыўную банкаўскую плацежную картку і ажыццяўляць плацяжы з яе выкарыстаннем", - дадалі ў Нацбанку.-0-
