5 кастрычніка, Мінск /Кар. БЕЛТА/. Любыя складанасці стымулююць прадпрыемствы развівацца. Такое меркаванне выказала намеснік старшыні канцэрна "Беллегпрам" Наталля Мурашка ў час панэльнай дыскусіі "Лёгкая прамысловасць у сучасных умовах. Праекты, стымулы, кааперацыя", якая праходзіць у рамках міжнароднай выстаўкі-кірмашу BelTexIndustry-2022 у НВЦ "БелЭкспа" ў Мінску, перадае карэспандэнт БЕЛТА.
"Наша мерапрыемства прымеркавана да адкрыцця BelTexIndustry-2022. Мяняецца час, мяняецца фармат і напаўненне выстаўкі. Разам з тым выстаўкі застаюцца асноўным інструментам пашырэння прадукцыі як на ўнутраным, так і на знешнім рынках", - сказала Наталля Мурашка.
Паводле яе слоў, нягледзячы на ўсе цяжкасці, якія галіна перажыла ў бягучым годзе, дэманструюцца добрыя тэмпы работы. "Мы павялічылі аб'ёмы паставак на знешнія рынкі, справіліся са складанасцямі, звязанымі з пастаўкамі сыравіны, матэрыялаў, лагістыкай, у тым ліку пры дапамозе нашых калег з Агенцтва знешнеэканамічнай дзейнасці. Таму хачу пацвердзіць тэзіс, што любыя складанасці дапамагаюць развівацца. Мы шмат чаму навучыліся і шмат што даведаліся", - акцэнтавала ўвагу намеснік старшыні "Беллегпрама".
Асноўным знешнегандлёвым партнёрам канцэрна застаецца Расійская Федэрацыя. "У бягучым годзе намі праведзена вялікая работа па выпрацоўцы сумесных мер, якія даюць магчымасць развіваць лёгкую прамысловасць дзвюх краін. Гэтыя меры прымаліся і на наднацыянальным узроўні - абнулены пошліны на многія таварна-сыравінныя пазіцыі, якія выкарыстоўваюцца пры вытворчасці тавараў легпрама і іншых, - адзначыла яна. - Таксама з Расійскай Федэрацыяй створана рабочая група ў галіне лёгкай прамысловасці, у рамках работы якой мы абмяркоўваем бягучую дзейнасць і шукаем магчымыя напрамкі сумеснага супрацоўніцтва. У прыватнасці, ужо намячаецца некалькі сумесных праектаў. Мы робім упор на перапрацоўцы расійскай шэрсці на нашых прадпрыемствах і далейшым экспарце гатовай прадукцыі ў РФ".
"Мы паважаем і цэнім партнёрскія адносіны з калегамі, якія сёння прысутнічаюць на нашай выстаўцы", - падкрэсліла Наталля Мурашка.
BelTexIndustry - буйнейшая галіновая выстаўка тавараў лёгкай прамысловасці Беларусі. Штогод удзельнікамі выстаўкі з'яўляюцца вытворцы і пастаўшчыкі вырабаў лёгкай прамысловасці, сыравіны, абсталявання, фурнітуры і аксесуараў, а таксама дызайнеры, канструктары, мадэльеры. Арганізатар - Нацыянальны выставачны цэнтр "БелЭкспа" пры падтрымцы канцэрна "Беллегпрам". Галоўная мэта выстаўкі - прадэманстраваць магчымасці беларускіх вытворцаў. Штогод яе наведваюць амаль 4 тыс. чалавек.
У гэтым годзе выстаўка праходзіць 5-7 кастрычніка. Форум збярэ звыш 50 экспанентаў з Турцыі, Расіі, Беларусі, парадуе яркім fashion-шоу і насычанай дзелавой праграмай, напоўненай актуальнымі тэмамі.-0-
