7 чэрвеня, Гомель /Кар. БЕЛТА/. Сусветная сітуацыя адкрыла для нас новыя рынкі. На гэтым зрабіў акцэнт намеснік генеральнага дырэктара па тэхналогіі і якасці БМЗ Сяргей Цярлецкі на сустрэчы з калектывам аднаго з цэхаў, паведамілі БЕЛТА на прадпрыемстве.
Па вытворчасці сталі БМЗ выйшла на паказчыкі дакрызіснага ўзроўню: каля 200 тыс. т за месяц. Прадпрыемства выконвае ўсе даведзеныя задачы.
"Сусветная сітуацыя з санкцыямі адкрыла для нас новыя рынкі. Спажыўцы ў Расіі, Казахстане, Узбекістане і іншых краінах знайшлі ў нашай асобе надзейных партнёраў, якія змаглі забяспечыць якасць і стабільнасць. Мы заходзім і займаем там свае нішы. Акрамя таго, ужо ў бягучым годзе на БМЗ з'явілася каля 40 працэнтаў інавацыйнай прадукцыі. Мы значна змянілі сартамент, падыходы, тэхналогіі, знайшлі новыя рынкі збыту і новыя прадукты", - растлумачыў Сяргей Цярлецкі.
Паводле даных намесніка дырэктара, завод працуе з чыстым прыбыткам. Пры гэтым ёсць патэнцыял для правядзення рамонтаў, абазначэння перспектыў па рэканструкцыі, а таксама павышэнні зарплаты.
ААТ "БМЗ - кіруючая кампанія холдынга "БМК" - высокатэхналагічнае прадпрыемства металургічнай галіны, якое структурна складаецца са звязаных тэхналагічным ланцужком вытворчасцей і цэхаў інфраструктуры.-0-
