25 верасня, Гомель /Кар. БЕЛТА/. Дэманстрацыйныя ўзоры тэхнікі "Гомсельмаша" знайшлі ўладальнікаў на XXII Паволжскай аграпрамысловай выстаўцы ў прыгарадзе Самары пасёлку Усць-Кінельскі, паведамляе БЕЛТА са спасылкай на сайт прадпрыемства.
У выстаўцы ўдзельнічалі прадстаўнікі сельскагаспадарчых арганізацый: ад невялікіх фермерскіх гаспадарак да буйных аграпрамысловых холдынгаў, вытворцы сельгастэхнікі і іншыя.
На пляцоўках форуму была прадэманстравана і карысталася павышанай увагай прадукцыя ААТ "Гомсельмаш" і ЗАТ СП "Брансксельмаш". Цікавасць выклікалі збожжаўборачныя камбайны GS10 MAX і GS12A1, універсальны энергасродак УЭС-2-280А з мульчыруючай фрэзай і сучасны кормаўборачны камбайн FS80.
"Дэманстрацыйныя ўзоры знайшлі сваіх пакупнікоў адразу на выстаўцы. Збожжаўборачны камбайн GS12A1 адправіўся ў Ялхоўскі раён да індывідуальнага прадпрымальніка Аляксея Міронава. УЭС-2-280А з мульчыруючай фрэзай вытворчасці ЗАТ СП "Брансксельмаш" будзе выкарыстоўвацца для расчысткі тэрыторыі ад драўнінна-хмызняковай расліннасці ТАА "Колас Паволжа" Чырвонаармейскага раёна. А камбайн GS10 MAX c палепшанымі спажывецкімі ўласцівасцямі, набыты праз праграму фінансавання АТ "Расагралізінг", будзе працаваць у СФГ Магамеда-Эміна Мусаева ў Похвіснеўскім раёне", - удакладнілі на прадпрыемстве.
Паводле ацэнак удзельнікаў выстаўкі, беларуская тэхніка вызначаецца аптымальнымі суадносінамі цаны і якасці.-0-