27 снежня, Мінск /Кар. БЕЛТА/. ТАА "Лясны Рэсурс", якое ўваходзіць у групу кампаній "Лясны Рэсурс", стала новым брокерам Беларускай універсальнай таварнай біржы ў Расіі, паведаміў карэспандэнту БЕЛТА прэс-сакратар БУТБ Раман Яніў.
Часткай групы кампаній таксама з'яўляецца міжнародны гандлёвы партал "ЛясныРэсурс.РФ" - адна з буйнейшых гандлёвых платформ лясной галіны Расіі і акрэдытаваны партнёр Расійскага экспартнага цэнтра. "У статусе брокера БУТБ ТАА "Лясны Рэсурс" будзе займацца прыцягненнем на беларускую біржавую пляцоўку пастаўшчыкоў піламатэрыялаў і іншай запатрабаванай прадукцыі, што выпускаецца расійскімі дрэваапрацоўчымі прадпрыемствамі. Лесаматэрыялы плануецца прадаваць як спажыўцам у Беларусі, так і замежным кліентам БУТБ праз механізм транзітных здзелак", - расказаў Раман Яніў.
Паводле слоў дырэктара групы кампаній "Лясны Рэсурс" Яўгена Рожанцава, яго стратэгічная мэта - выйсці на першае месца ў рэйтынгу актыўнасці біржавых брокераў БУТБ па напрамку "лесапрадукцыя", прычым як па колькасці кліентаў, так і па аб'ёме заключаных здзелак. "Перш за ўсё мы хочам стаць адзінай кропкай уваходу на рынак Беларусі для расійскіх прадпрыемстваў лясной галіны. Гэта задача нумар адзін, і я ўпэўнены, што мы з ёю паспяхова справімся. Тым больш што з біржавым гандлем мы знаёмы не па чутках, таму што ў нас ужо ёсць станоўчы вопыт работы на Санкт-Пецярбургскай міжнароднай таварна-сыравіннай біржы", - сказаў Яўген Рожанцаў.
"Акрамя таго, плануем выкарыстоўваць беларускую біржавую пляцоўку для прасоўвання вырабленай у Расіі лесапрадукцыі ў Еўропу, Азію, Афрыку і іншыя перспектыўныя рэгіёны. На нашым гандлёвым партале зарэгістравана больш за 18 тыс. прадпрыемстваў, многія з якіх, безумоўна, зацікавяцца магчымасцямі БУТБ. У той жа час кампаніі, акрэдытаваныя на беларускай біржы, з'яўляюцца патэнцыяльнымі дзелавымі партнёрамі для карыстальнікаў нашага партала. Іншымі словамі, наша супрацоўніцтва з БУТБ мае ўзаемавыгадны характар і забяспечыць станоўчы эканамічны эфект як для беларускіх, так і для расійскіх суб'ектаў гаспадарання", - падкрэсліў дырэктар групы кампаній.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных бірж ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
Цяпер на БУТБ акрэдытавана звыш 50 брокерскіх арганізацый, у тым ліку 13 нерэзідэнтаў з 9 краін. На долю біржавых брокераў прыпадае каля 40 працэнтаў біржавога тавараабароту.-0-
