27 лістапада, Мінск /Кар. БЕЛТА/. Праекты Мінскага трактарнага завода па будаўніцтве новых ліцейнага завода і кавальска-штампавай вытворчасці знаходзяцца на перадінвестыцыйнай стадыі. Аб гэтым заявіў намеснік тэхнічнага дырэктара па падрыхтоўцы металургічнай вытворчасці - галоўны металург прадпрыемства Уладзімір Гацура, выступаючы на 28-й Міжнароднай навукова-тэхнічнай канферэнцыі "Ліцейная вытворчасць і металургія-2020. Беларусь", якая 26 лістапада праходзіла на базе ААТ "МТЗ", паведамілі БЕЛТА ў прэс-службе завода.
У прыватнасці, Уладзімір Гацура расказаў, што ў адпаведнасці са стратэгіяй развіцця холдынга "МТЗ-Холдынг" да 2030 года прадугледжана глабальная мадэрнізацыя ўсіх існуючых тэхналагічных перапрацовак нарыхтоўчай вытворчасці з будаўніцтвам і арганізацыяй новых высокатэхналагічных рэсурсазберагальных сучасных вытворчасцей. Плануецца ўзвядзенне ліцейнага завода і кавальска-штампавай вытворчасці.
"Цяпер абодва праекты знаходзяцца ў перадінвестыцыйнай стадыі: аб'яўлены конкурсы для выбару кампаній па правядзенні інжынірынгавых работ і распрацоўцы тэхніка-эканамічнага абгрунтавання", - адзначыў галоўны металург.
Вытворчая магутнасць новага ліцейнага завода, які будзе пабудаваны за межамі Мінска, складзе 300 тыс. т у год чыгуннага ліцця і 100 тыс. т у год - стальнога. Праектам будаўніцтва сучаснай кавальска-штампавай вытворчасці прадугледжваецца вынас кузні з тэрыторыі ААТ "МТЗ" і стварэнне магутнасцей у аб'ёме 200 тыс. т паковак у год.
"У аснову двух інвестыцыйных праектаў закладзены лічбавыя і адытыўныя тэхналогіі, якія дадуць магчымасць шматразова знізіць фінансавыя, працоўныя і часавыя затраты на асваенне новай прадукцыі, пошук прычын браку і ўдасканаленне ліцейнай тэхналогіі", - падкрэсліў Уладзімір Гацура.
Паводле яго слоў, актыўнае і правільнае прымяненне камп'ютарнага мадэлявання ліцейных і кавальскіх працэсаў дасць магчымасць на стадыі праектавання прааналізаваць верагоднасць узнікнення дэфектаў і аптымізаваць тэхналогію вырабу і канструкцыю адлівак і паковак. Таксама прадугледжана распрацоўка новых метадаў ліцця, штампоўкі і тэхналогій, якія забяспечваюць стабільнасць і высокую якасць загатовак як у дробнасерыйнай, так і ў масавай вытворчасцях. Прымяненне новых матэрыялаў з "пакетам" унікальных характарыстык пашырыць наменклатуру вырабаў.
"Рэалізацыя інвестыцыйных праектаў у далейшым забяспечыць вырашэнне важнейшых для Беларусі задач па збалансаванасці эканомікі, росце экспарту, павелічэнні долі навукаёмістай і высокатэхналагічнай прадукцыі ў агульным аб'ёме беларускага экспарту, забеспячэнні дадатнага гандлёвага балансу, а таксама вырашэнні пытанняў імпартазамяшчэння, павышэння пазіцый у міжнародных рэйтынгах", - запэўніў Уладзімір Гацура.
28-я Міжнародная навукова-тэхнічная канферэнцыя "Ліцейная вытворчасць і металургія-2020. Беларусь" праходзіць у Мінску 25-27 лістапада па ініцыятыве Асацыяцыі ліцейшчыкаў і металургаў Рэспублікі Беларусь. Мерапрыемства прымеркавана да 100-годдзя беларускага нацыянальнага тэхнічнага ўніверсітэта.
Мінскі трактарны завод - адзін з буйнейшых вытворцаў сельскагаспадарчай тэхнікі ў свеце. У склад холдынга акрамя МТЗ уваходзяць дзесяць прадпрыемстваў, створана 25 зборачных вытворчасцей за мяжой. На вытворчасці працуюць больш за 16 тыс. чалавек, прадукцыя прадстаўлена на рынках больш як 60 дзяржаў.-0-
