Сцяг Панядзелак, 22 красавіка 2024
Усе навіны
Усе навіны
Эканоміка
27 студзеня 2023, 14:53

МПЗ: у 2022 годзе ў кансалідаваны бюджэт паступіла больш за Br36,5 млрд

27 студзеня, Мінск /Кар. БЕЛТА/. За 2022 год падатковыя органы забяспечылі паступленне ў даход кансалідаванага бюджэту Беларусі больш за Br36,5 млрд. Аб гэтым паведаміў міністр па падатках і зборах Сяргей Налівайка на пасяджэнні падагульняючай калегіі МПЗ, перадае карэспандэнт БЕЛТА.

"Мінулы год для нашай дзяржавы быў няпростым, напружаным. Жорсткія міжнародныя санкцыі і абвастрэнне геапалітычнай абстаноўкі прадказвалі нам істотны спад эканомікі і рэзкае пагаршэнне ўзроўню жыцця насельніцтва. Аднак гэтага не адбылося. Дзякуючы своечасова прынятым кіраўніком дзяржавы і ўрада мерам па падтрымцы эканомікі, намаганням вытворчага менеджменту, прадпрыемствы рэальнага сектара змаглі перабудаваць бізнес-працэсы і пераарыентавацца на новыя рынкі. Гэта дало магчымасць забяспечыць устойлівасць работы эканомікі і выкананне сацыяльных гарантый", - сказаў Сяргей Налівайка.

Паводле яго слоў, у 2022 годзе падатковымі органамі забяспечана паступленне ў даход кансалідаванага бюджэту больш за Br36,5 млрд, што склала 102,9 працэнта да планавых назначэнняў (звыш плана паступіла больш за Br1 млрд), у тым ліку ў рэспубліканскі бюджэт - больш за Br13,97 млрд (102,3 працэнта, звыш плана - Br316,4 млн), у мясцовыя бюджэты - амаль Br22,6 млрд (103,2 працэнта, звыш плана - Br708 млн).

Найбольшая ўдзельная вага паступленняў традыцыйна па падатку на дабаўленую вартасць (ПДВ) - 27,4 працэнта, у бюджэт паступіла больш за Br10 млрд.

Значныя паступленні па падаходным падатку (удзельная вага 25,4 працэнта, больш за Br9,28 млрд), па падатку на прыбытак (15,1 працэнта, больш за Br5,5 млрд). У агульнай суме паступленняў найбольшую ўдзельную вагу займаюць плацяжы арганізацый - 94,1 працэнта, або больш за Br34,38 млрд.

На долю арганізацый дзяржаўнага сектара эканомікі прыпадае 38,6 працэнта ад агульнай сумы паступленняў, якія кантралююцца падатковымі органамі. Гэтай катэгорыяй плацельшчыкаў у бюджэт выплачана больш за Br14 млрд.

Удзельная вага плацяжоў арганізацый недзяржаўнага сектара эканомікі ў фарміраванні даходаў бюджэту склала 55,5 працэнта. У бюджэт ад гэтай катэгорыі плацельшчыкаў паступіла больш за Br20,28 млрд. Ад суб'ектаў малога і сярэдняга бізнесу ў 2022 годзе паступіла больш за Br13,18 млрд, удзельная вага ў даходах бюджэту - 36,1 працэнта.

Сярод індывідуальных прадпрымальнікаў найбольшы ўклад у фарміраванне даходаў бюджэту забяспечылі індывідуальныя прадпрымальнікі, падаткаабкладанне якіх ажыццяўляецца ў агульнаўстаноўленым парадку. Іх паступленні склалі Br535,9 млн, або 52,6 працэнта ў агульнай суме плацяжоў гэтай катэгорыі плацельшчыкаў, і павялічыліся адносна ўзроўню 2021 года ў 2,8 раза.

Колькасць фізічных асоб, якія з'яўляюцца плацельшчыкамі падаткаў, на 1 студзеня 2023 года склала 5,3 млн чалавек, павялічыўшыся да ўзроўню 1 студзеня 2022 года на 1,5 млн чалавек, або ў 1,4 раза.

У даход бюджэту ад фізічных асоб паступіла больш за Br1,1 млрд, удзельная вага ў агульнай суме даходаў - 3,1 працэнта. Па стане на 1 студзеня 2023 года электроннае ўзаемадзеянне з падатковымі органамі ажыццяўляюць больш за 337 тыс. суб'ектаў гаспадарання, або 84,5 працэнта ад іх агульнай колькасці, якія знаходзяцца на ўліку ў падатковых органах, у тым ліку 88,3 працэнта арганізацый і 82,6 працэнта індывідуальных прадпрымальнікаў.-0-

Падпісвайцеся на нас у
Twitter
Топ-навіны
Свежыя навіны Беларусі