27 сакавіка, Мінск /Кар. БЕЛТА/. Начальнік галоўнага ўпраўлення падаткаабкладання фізічных асоб Міністэрства па падатках і зборах Андрэй Кавалеўскі на прэс-канферэнцыі "Асаблівасці дэкларавання даходаў фізічных асоб у 2023 годзе" нагадаў аб неабходнасці падачы падатковых дэкларацый за 2022 год да 31 сакавіка, перадае карэспандэнт БЕЛТА.
Асноўная катэгорыя грамадзян, што павінны прадаставіць дэкларацыі, - асобы, прызнаныя падатковымі рэзідэнтамі Беларусі, гэта значыць якія пражылі на тэрыторыі краіны больш за 183 дні і атрымлівалі даходы з-за мяжы. "Гэта можа быць заработная плата, любое падобнае ўзнагароджанне, даходы ад выкарыстання ўкладных рахункаў на тэрыторыі замежнай дзяржавы, выйгрышы ў замежных анлайн-казіно і даходы ад блогерства. Акрамя таго, дэкларацыю прадстаўляюць асобы, якія на працягу 2022 года прадалі два і больш легкавыя аўтамабілі, адзін або больш грузавы аўтобус, а таксама грамадзяне, якія на працягу пяці гадоў прадалі больш за адну кватэру, жылы дом, зямельны ўчастак. Акрамя таго, дэкларацыю неабходна прадаставіць тым грамадзянам, якія атрымалі падарунак ад асоб, што не знаходзяцца ў адносінах блізкага сваяцтва, на суму большую за Br8078. Гэта датычыцца як атрыманага даходу ў Беларусі, так і за мяжой з дапамогай банкаўскіх, паштовых і іншых пераводаў. Калі сума не перавышае ўстаноўленую, то дэкларацыю прадастаўляць не патрабуецца, а калі перавышае, то падатку падлягае сума перавышэння", - расказаў Андрэй Кавалеўскі.
За непрадастаўленне дэкларацыі ва ўстаноўлены тэрмін прадугледжана адміністрацыйная адказнасць. Максімальны памер штрафу можа складаць да 10 базавых велічынь (1 БВ - Br37). "Ён з'яўляецца разліковым і залежыць ад колькасці месяцаў спазнення", - растлумачыў начальнік галоўнага ўпраўлення.-0-
