14 сакавіка, Мінск /Кар. БЕЛТА/. Старшыня Савета Рэспублікі Міхаіл Мясніковіч лічыць, што дзяржструктурам і бізнесу неабходна больш актыўна аб'ядноўвацца ў вырашэнні задач сацыяльна-эканамічнага развіцця Беларусі. Такое меркаванне ён выказаў сёння на міжнароднай навукова-практычнай канферэнцыі "Інструменты павышэння эфектыўнасці нарматворчай дзейнасці", перадае карэспандэнт БЕЛТА.
Старшыня Савета Рэспублікі нагадаў аб нядаўняй сур'ёзнай размове, якая адбылася пры разглядзе вынікаў работы ўрада, Нацыянальнага банка, аблвыканкамаў і Мінскага гарвыканкама ў 2017 годзе. Тады Прэзідэнт Аляксандр Лукашэнка ўказаў на шэраг нявырашаных задач сацыяльна-эканамічнага развіцця краіны. Кіраўнік дзяржавы акцэнтаваў увагу на няпростай сітуацыі ў інвестыцыйнай і інавацыйнай сферах дзейнасці, падкрэсліў неабходнасць дадатковых рашэнняў па забеспячэнні эфектыўнай занятасці насельніцтва, павышэння жыццёвага ўзроўню грамадзян.
"Прэзідэнт справядліва і сістэмна сфармуляваў неабходнасць зладжанай работы ўсіх дзяржаўных органаў, усіх галін улады і бізнес-супольнасці па дасягненні прыярытэтных мэт. Гэта не толькі задача ўрада як выканаўчай улады, гэта задача ўрада ў шырокім сэнсе як улады ў цэлым", - сказаў Міхаіл Мясніковіч.
Звяртаючыся да прадстаўнікоў беларускага боку - удзельнікаў канферэнцыі, ён заявіў, што ў практычнай дзейнасці даводзіцца сутыкацца з фактамі месніцтва, ведамаснасці, што наносіць шкоду рэальнай справе. "Калі размова ідзе аб важных дзяржаўных задачах, не павінна быць пазіцыі "мая хата з краю". Намаганні ўсіх дзяржаўных і камерцыйных структур трэба падпарадкаваць дасягненню пастаўленых мэт", - падкрэсліў кіраўнік верхняй палаты парламента. Ён задаўся пытаннем, чаму чыноўнікі, ды і некаторыя кіраўнікі дзяржорганаў не заўсёды ідуць на ўзгадненне смелых ініцыятыў, а думаюць толькі аб карпаратыўных інтарэсах. "Наша агульная задача - выпрацаваць беспамылковыя заканадаўчыя рашэнні, што забяспечваюць фарміраванне спрыяльных умоў для развіцця эканомікі, а ў канчатковым выніку - дабрабыт кожнага грамадзяніна", - упэўнены Міхаіл Мясніковіч.
Ён прапанаваў удзельнікам канферэнцыі звярнуцца да рашэнняў пятага Усебеларускага народнага сходу, якія вызначылі прыярытэты і мэтавыя арыенціры развіцця краіны на сярэднетэрміновую перспектыву. "Аб'ектыўна ацэньваючы дзеючае заканадаўства, думаю, што нарматыўная прававая база патрабуе развіцця, каб паспяхова рэалізаваць намечанае, асабліва з улікам знешніх выклікаў і пагроз, з якімі даводзіцца сутыкацца нашай краіне", - адзначыў старшыня Савета Рэспублікі.
Беларусь адбылася як суверэнная дзяржава. "У нас ёсць чым ганарыцца ў фарміраванні сучаснага і даволі поўнага заканадаўства. Але жыццё не стаіць на месцы. І калі ў першыя гады дзяржаўнага будаўніцтва разам з базавымі, кадыфікаванымі заканадаўчымі актамі прымалася значная колькасць нарматыўных прававых актаў, што рэгулююць асобныя пытанні, то цяпер мы працуем над комплекснымі і сістэмнымі заканадаўчымі рашэннямі", - сказаў Міхаіл Мясніковіч.
Сёння ў Савеце Рэспублікі праходзіць міжнародная навукова-практычная канферэнцыя "Інструменты павышэння эфектыўнасці нарматворчай дзейнасці". У мерапрыемстве ўдзельнічаюць члены Савета Рэспублікі, дэпутаты Палаты прадстаўнікоў, прадстаўнікі Канстытуцыйнага суда, Вярхоўнага суда, міністэрстваў, Нацыянальнага цэнтра заканадаўства і прававых даследаванняў, Нацыянальнага цэнтра прававой інфармацыі, вучоныя і замежныя эксперты. Удзельнікі канферэнцыі абмяркоўваюць новыя падыходы да нарматворчасці. Па выніках Савет Рэспублікі падрыхтуе рэкамендацыі, якія будуць уключаны ў законапраект аб нарматыўных прававых актах.-0-
