3 лютага, Мінск /Кар. БЕЛТА/. Краіны ЕАЭС маюць высокі ўзровень развіцця электроннага ўрада. Аб гэтым заявіў старшыня Калегіі Еўразійскай эканамічнай камісіі Міхаіл Мясніковіч у час пленарнай сесіі лічбавага форуму "Digital Almaty 2023: Лічбавае партнёрства ў новай рэальнасці", паведамляе карэспандэнт БЕЛТА.
"Усе краіны нашага эканамічнага саюза, паводле ацэнкі міжнародных экспертаў і ў рэйтынгу ААН 2022 года, маюць высокі або вельмі высокі ўзровень развіцця электроннага ўрада. Пры гэтым агульныя тэндэнцыі развіцця супадаюць ва ўсіх краінах. У прыярытэтным парадку ажыццяўляецца непасрэдна само лічбавае развіццё, павялічваецца даступнасць паслуг, растуць інвестыцыі ў лічбавыя тэхналогіі ў сферы адукацыі, гандлю, апрацоўчай прамысловасці і іншых галінах рэальнай эканомікі", - сказаў Міхаіл Мясніковіч.
Разам з тым, паводле яго слоў, аб'ектыўная рэальнасць такая, што ўзроўні лічбавага развіцця ў краінах ЕАЭС адрозніваюцца. "Наша камісія прыкладае намаганні, каб існуючымі інструментамі садзейнічаць павышэнню ўзроўню інфарматызацыі ў дзяржавах - членах саюза ў цэлым. Аснову інфармацыйнай архітэктуры складае інтэграваная інфармацыйная сістэма, якая ўяўляе сабой комплексны механізм міждзяржаўнага інфармацыйнага абмену", - адзначыў ён.
Узаемадзеянне дзяржаўных органаў усіх краін саюза - адна з важнейшых умоў рытмічнага функцыянавання адзінага рынку. "На гэты момант краіны актыўна карыстаюцца гэтай сістэмай. Апошні год мы даволі сур'ёзна падцягнулі шэраг пытанняў, якія былі недастаткова паспяхова вырашаны. Створаны магчымасці, неабходная база, і сёння ўведзена ў эксплуатацыю 54 агульныя працэсы. Да канца 2024 года мы давядзём колькасць бізнес-працэсаў, па якіх будзе ажыццяўляцца інфармацыйны абмен паміж краінамі саюза, як мінімум да 90 працэнтаў ад зацверджанага плана", - паведаміў старшыня Калегіі ЕЭК.
"Еўразійскай эканамічнай камісіі трэба будзе ў сувязі з гэтым выканаць даволі вялікі аб'ём работ па поўным тэхнічным і арганізацыйным забеспячэнні інфармацыйнага абмену фармату G2G у рамках розных бізнес-працэсаў. "Ужо створаная база дае магчымасць сцвярджаць, што з гэтымі задачамі мы справімся. Вядома, пры актыўнай пазіцыі ўрадаў дзяржаў - членаў саюза па развіцці нацыянальных сегментаў і інфармацыйнага абмену паміж дзяржаўнымі органамі. Асноўныя дакументы для гэтага ёсць", - падкрэсліў Міхаіл Мясніковіч.
Digital Almaty - традыцыйная дыялогавая пляцоўка для абмеркавання лічбавага парадку дня, новых стратэгій лічбавай трансфармацыі і трэндаў у сферы лічбавых тэхналогій. Форум праводзіцца пяты раз. Галоўнай тэмай дыскусіі стануць сучасныя глабальныя выклікі развіцця індустрыі інавацыйных тэхналогій. Дзелавая праграма форуму складаецца з 20 панэльных сесій, на якіх выступяць больш за 150 спікераў - прадстаўнікоў міжнароднай і казахстанскай ІТ-супольнасці. Чакаецца, што ўдзел у Digital Almaty прымуць больш за 15 тыс. чалавек з 30 краін. На панэльных сесіях удзельнікі форуму абмяркуюць фарсіраваны пераход галін прамысловасці ад аўтаматызацыі да лічбавізацыі, перспектывы лічбавага майнінгу, сферы прымянення рабатызацыі, развіццё ІТ-галіны ў Еўразійскім рэгіёне.
На форуме будуць арганізаваны выстаўкі краінавых тэхнапаркаў, міжнародных вендараў і венчурных фондаў. Акрамя таго, будзе арганізавана Алея стартапаў, дзе прадставяць 100 новых праектаў. Упершыню ў рамках форуму будзе праводзіцца чэмпіянат па робататэхніцы і інавацыйных тэхналогіях сярод школьнікаў Digital Ministry Cup. Буйнейшыя ІТ-кампаніі прадставяць свае вакансіі і кар'ерныя магчымасці.-0-
