30 снежня, Масква /Эдуард Півавар - БЕЛТА/. Старшыня Калегіі Еўразійскай эканамічнай камісіі Міхаіл Мясніковіч лічыць пазітыўным 2021 год для Еўразійскага эканамічнага саюза. Такую ацэнку ён зрабіў у навагоднім віншаванні, распаўсюджаным ЕЭК, паведамляе БЕЛТА.
"Адыходзячы год склаўся вельмі пазітыўна для Еўразійскага эканамічнага саюза, - канстатаваў Міхаіл Мясніковіч. - Негатыўны ўплыў пандэміі COVID-19 на эканомікі нашых краін паступова слабее. Растуць аб'ёмы прамысловай вытворчасці, больш як у два разы скарацілася беспрацоўе, амаль на трэць узрос узаемны і знешні гандаль таварамі".
Ён нагадаў, што ў 2021 годзе прыняты важныя для еўразійскай інтэграцыі рашэнні. Падпісана пагадненне аб прымяненні ў саюзе навігацыйных пломбаў для сачэння за перавозкамі. Забяспечаны роўны доступ суб'ектаў гаспадарання краін ЕАЭС да дзяржаўных закупак. Запушчаны праект "Работа без граніц", рэалізацыя якога пашырае магчымасці працаўладкавання і найму грамадзян на саюзным рынку працы. Уступіла ў сілу пагадненне аб пенсійным забеспячэнні работнікаў дзяржаў ЕАЭС.
Прадоўжана работа па фарміраванні адзінай сістэмы тэхнічнага рэгулявання саюза, якая не мае аналагаў у міжнароднай практыцы. Запушчана рэалізацыі праекта "Лічбавае тэхнічнае рэгуляванне ў рамках Еўразійскага эканамічнага саюза".
"Такія рэзультаты сталі вынікам зладжаных намаганняў нацыянальных урадаў і кіруючых органаў саюза, уключаючы Еўразійскую эканамічную камісію, - адзначыў старшыня Калегіі ЕЭК. - Падводзячы вынікі адыходзячага года, хацелася б выказаць словы асаблівай удзячнасці кіраўнікам дзяржаў, урадаў, членам Савета ЕЭК за вялікі асабісты ўклад у развіццё еўразійскай інтэграцыі".
Міхаіл Мясніковіч падкрэсліў: ЕАЭС паступальна развіваецца, збліжаюцца эканамічныя і заканадаўчыя пазіцыі дзяржаў-членаў, ЕАЭС становіцца рэгіянальным цэнтрам прыцягнення інвестыцый і інтэлектуальных рэсурсаў, высокіх тэхналогій, моцным, канкурэнтаздольным і працвітаючым аб'яднаннем.
"У саюзе камфортна працаваць і развівацца. Гэта, магчыма, галоўнае дасягненне еўразійскай інтэграцыі. У нас многае атрымалася. Але нам трэба будзе і многае зрабіць. Наперадзе - новыя задачы", - сказаў на заканчэнне старшыня Калегіі ЕЭК.-0-
