29 чэрвеня, Мінск /Кар. БЕЛТА/. Міжведамасная рабочая група падрыхтуе прапановы па пытаннях сацыяльна-эканамічнага развіцця Палескага рэгіёна, а таксама па мэтазгоднасці будаўніцтва ў гэтым рэгіёне ўчастка чыгункі. Гэта прадугледжана распараджэннем прэм'ер-міністра Беларусі Рамана Галоўчанкі ад 24 чэрвеня 2020 года нумар 139р, паведамілі БЕЛТА ў прэс-службе ўрада.
Рабочай групе пастаўлена задача комплексна разгледзець пытанні сацыяльна-эканамічнага развіцця Палескага рэгіёна, максімальнага выкарыстання прыродных рэсурсаў, прыцягнення патэнцыяльных інвестараў для рэалізацыі інвестпраектаў у галіне здабычы і перапрацоўкі карысных выкапняў, развіцця транспартнай інфраструктуры.
Па выніках гэтай работы трэба прадставіць ва ўрад прапановы аб сацыяльна-эканамічным развіцці Палескага рэгіёна.
Міністэрству эканомікі даручана да 10 ліпеня накіраваць ва ўрад праект даклада кіраўніку дзяржавы аб мэтазгоднасці будаўніцтва ў Палескім рэгіёне ўчастка чыгункі Глушкавічы - Лельчыцы - Міхалкі.
Каардынаваць работу і кантраляваць выкананне распараджэння будуць намеснікі прэм'ер-міністра Уладзімір Кухараў і Юрый Назараў, а таксама старшыня Гомельскага аблвыканкама Генадзь Салавей.-0-
