9 верасня, Мінск /Кар. БЕЛТА/. Аб'ёмы перавалкі беларускіх грузаў праз астраханскія парты растуць. Аб гэтым заявіў першы намеснік міністра транспарту і камунікацый Беларусі Аляксей Ляхновіч у час пасяджэння рабочай групы па супрацоўніцтве Беларусі і Астраханскай вобласці, паведамілі БЕЛТА ў прэс-службе Мінтранса.
Расійскі рэгіён з'яўляецца адным са стратэгічных партнёраў для Беларусі. Партнёрскія адносіны паспяхова развіваюцца па шырокім спектры напрамкаў у самых розных сферах - гандлі, прамысловасці, сельскай гаспадарцы, транспарце, будаўніцтве, навуцы і адукацыі, многіх іншых. Аб высокіх тэмпах супрацоўніцтва Беларусі з Астраханскай вобласцю сведчыць дадатная дынаміка тавараабароту. "За першае паўгоддзе ён вырас амаль на 150 працэнтаў да ўзроўню 2021 года і склаў больш за $33 млн. Думаю, тэмпы будуць толькі расці і па выніках года мы выйдзем на больш высокія паказчыкі", - сказаў Аляксей Ляхновіч.
Важным для Беларусі пытаннем з'яўляецца выкарыстанне інфраструктуры расійскіх партоў для экспарту беларускіх тавараў. "У гэтым напрамку праведзена вялікая работа. І сёння назіраецца істотны рост перавалкі беларускіх грузаў праз астраханскія марскія парты - за апошнія месяцы больш за 70 тыс. т. Па выніках года плануем выйсці на лічбу 210 тыс. т", - адзначыў першы намеснік міністра.
Акрамя таго, паводле яго слоў, Беларусь зацікаўлена ў нарошчванні аб'ёмаў грузаперавозак праз расійскія транспартныя калідоры, у прыватнасці, па міжнародным калідоры "Поўнач - Поўдзень". Цяпер для пашырэння геаграфіі перавозак і пераарыентацыі беларускага экспарту сумесна з Мінтрансам Расіі падрыхтавана міжурадавае пагадненне аб супрацоўніцтве ў галіне развіцця перавозак асобных відаў грузаў па тэрыторыі дзвюх дзяржаў.
У снежні 2021 года ў Мінску быў падпісаны план мерапрыемстваў на 2022-2024 гады па рэалізацыі пагаднення аб супрацоўніцтве паміж урадамі Беларусі і Астраханскай вобласці. Удзельнікі сумеснага пасяджэння дэталёва абмеркавалі прыярытэтныя напрамкі шматбаковага ўзаемадзеяння, намецілі планы па новых сумесных праектах.
Віцэ-губернатар Алег Князеў падкрэсліў важнасць партнёрскіх і дружалюбных адносін з Беларуссю. Ён нагадаў, што сёння дзейнічаюць пагадненні аб супрацоўніцтве рэгіёна не толькі з беларускім урадам, але і з Брэсцкай і Віцебскай абласцямі ў розных сферах.
"Астраханцамі запатрабавана прадукцыя беларускіх вытворцаў, асабліва харчовыя і тавары лёгкай прамысловасці. Высокім попытам карыстаецца сельгастэхніка беларускай вытворчасці, асноўную долю якой складаюць трактары МТЗ. У гэтым годзе ў нас адкрыецца гандлёва-сэрвісны цэнтр завода", - сказаў Алег Князеў. Паводле яго слоў, кожная сумесная сустрэча дае магчымасць партнёрам знаходзіць новыя агульныя інтарэсы і новыя магчымасці для развіцця эканамічнага патэнцыялу.-0-
