21 студзеня, Мінск /Кар. БЕЛТА/. Мінскі падшыпнікавы завод выйшаў на рынак Германіі. У верасні 2020 года МПЗ выйграў тэндар на пастаўку кампаніі Ventprom Deutschland GmbH чатырох падшыпнікаў для ўстаноўкі ў шахтавых вентылятарах. Сёння была арганізавана іх адгрузка, паведамілі карэспандэнту БЕЛТА на прадпрыемстве.
"Нашы традыцыйныя рынкі ў Еўропе - гэта Польшча, Латвія, Літва. Тыя краіны, што размешчаны побач з Беларуссю. І на гэта ёсць свае аб'ектыўныя прычыны. Еўрасаюз грунтоўна абараняе сваіх вытворцаў. Так, уся прадукцыя, якая ўвозіцца ў ЕС, абкладаецца пошлінай у памеры 8 працэнтаў, што ставіць нашы падшыпнікі ў нявыгадныя цэнавыя ўмовы. Іншы стрымальны фактар - наяўнасць у Еўрасаюзе мноства падшыпнікавых заводаў, канкурыруючых з намі па наменклатуры: URB (Румынія), ZKL (Чэхія), FAG (Германія), SKF (Швецыя), - расказала начальнік аддзела знешнеэканамічных сувязей завода Алена Васькіна. - Нягледзячы на жорсткую канкурэнцыю, патрабавальныя нямецкія спажыўцы аддалі перавагу беларусам. У верасні МПЗ выйграў тэндар на пастаўку чатырох падшыпнікаў 30-3680AMXHУ2 для ўстаноўкі ў шахтавых вентылятарах. Сума кантракта склала 55,3 тыс. еўра".
Гандлёвы знак MPZ вельмі добра зарэкамендаваў сябе на замежных рынках. "Спажыўцы ва ўсім свеце ведаюць, што МПЗ - гэта якасць. Сведчаннем таго і шматлікія выпрабаванні, дзе нашы падшыпнікі па гэтай пазіцыі ў ліку сусветных лідараў, не ўступаючы ні ў чым таму ж SKF. Нашай канкурэнтнай перавагай з'яўляецца вытворчасць падшыпнікаў па поўным вытворчым цыкле і, вядома ж, аптымальныя суадносіны якасці і цаны. Таму камерцыйнае прапанаванне, якое мы зрабілі нямецкаму боку, цалкам задаволіла яго", - падкрэсліла начальнік аддзела знешнеэканамічных сувязей.
Мінскі падшыпнікавы завод пастаўляе на экспарт звыш 75 працэнтаў сваёй прадукцыі. На долю далёкага замежжа прыпадае каля 16 працэнтаў паставак. "Аснову экспартнага прапанвання МПЗ у краінах далёкага замежжа складае таварная лінія ролікавых сферычных падшыпнікаў. Яна канкурэнтаздольна, запатрабавана, карыстаецца попытам, добра сябе зарэкамендавала. Гэта двухрадковыя ролікавыя сферычныя падшыпнікі, якія прымяняюцца ў горназдабыўной, металургічнай, цэментнай і іншых галінах прамысловасці. Іншыя канструктыўныя групы (шарыкавыя, шарнірныя падшыпнікі) не так запатрабаваны. Іх пастаўкі за мяжу не сталі пакуль масавымі", - дадала начальнік АЗЭС.
Калі разглядаць рынкі з пункту гледжання аб'ёмаў паставак МПЗ, то на першым месцы знаходзіцца Індыя, затым ідуць Іран, В'етнам, Аб'яднаныя Арабскія Эміраты і Егіпет. Таксама прадпрыемства паспяхова супрацоўнічае з партнёрамі з Еўропы, пастаўляючы падшыпнікі ў Латвію, Польшчу, Сербію, Славакію, Балгарыю.
"Мы плануем не толькі захаваць свае пазіцыі на рынках краін далёкага замежжа, але і павялічваць аб'ёмы. Для гэтага робіцца ўсё: шукаем новых гандлёвых кліентаў, удзельнічаем у тэндарах, ажыццяўляем рассылкі, працуем з дыстрыб'ютарамі. У сувязі з каранавірусам пахіснулася эканоміка ўсіх краін свету. І нашы спажыўцы таксама сталі вельмі сур'ёзна лічыць грошы. Цяпер нашы падшыпнікі ўсё часцей закупляюцца на рамонты толькі пад аварыйныя сітуацыі. Ніхто не хоча "замарожваць" грошы на складзе. Тым не менш МПЗ - гэта брэнд, які ведаюць ва ўсім свеце. І вельмі важна, каб на заводзе прадукцыя выраблялася своечасова, згодна з умовамі кантракта. Бо як толькі мы зрываем тэрміны, замест нас падшыпнікі пастаўляюць іншыя. А страціўшы пазіцыі на рынку, іх аднаўляць вельмі цяжка", - растлумачыла Алена Васькіна.
Асноўныя мэты ААТ "МПЗ" для рынкаў краін далёкага замежжа на 2021 год - гэта захаванне, нарошчванне і павелічэнне ў будучым аб'ёмаў супрацоўніцтва з дзеючымі партнёрамі, а таксама пошук новых кліентаў і канчатковых спажыўцоў.
Мінскі падшыпнікавы завод заснаваны ў 1948 годзе. Ён уваходзіць у дзясятку буйнейшых прадпрыемстваў Беларусі і з'яўляецца адным з вядучых вытворцаў падшыпнікаў ва Усходняй Еўропе і СНД. Колькасць персаналу налічвае каля 2 тыс. чалавек. Асартымент падшыпнікаў, што выпускаюцца пад маркай MPZ, складае больш за 600 мадэлей, ад амаль ювелірных вырабаў дыяметрам 10 мм і масай 19 г да гігантаў дыяметрам 980 мм і вагой да 880 кг. Аб'ём выпуску падшыпнікаў складае больш за 5 млн штук у год. Сёння МПЗ пастаўляе прадукцыю больш як у 20 дзяржаў свету. Асноўныя спажыўцы прадукцыі - прадпрыемствы машынабудаўнічай, горназдабыўной, металургічнай, энергетычнай, будаўнічай, нафтагазавай і абароннай прамысловасці.-0-
