23 красавіка, Мінск /Кар. БЕЛТА/. Мінскі маторны завод атрымаў ліцэнзію Міністэрства па надзвычайных сітуацыях на права ажыццяўлення дзейнасці ў галіне выкарыстання атамнай энергіі і крыніц іанізуючага выпрамянення. У сувязі з гэтым пачаты сертыфікаваныя работы на сучасным высокатэхналагічным абсталяванні, не маючым аналагаў у Беларусі, - прамысловым камп'ютарным тамографе, паведамілі карэспандэнту БЕЛТА ў прэс-службе ААТ "Кіруючая кампанія холдынга "ММЗ".
"Прамысловы камп'ютарны тамограф быў закуплены ў мінулым годзе ў рамках развіцця галіновай лабараторыі і мадэрнізацыі вытворчасці Мінскага маторнага завода. Ён забяспечвае ўнікальныя магчымасці, якія не прадастаўляе ніводная іншая тэхналогія. З яго дапамогай праз сканіраванне рэнтгенаўскім выпрамяненнем можна праводзіць унутраныя і знешнія вымярэнні ў рэжыме неразбуральнага кантролю", - расказалі ў прэс-службе.
Напрыклад, адна з апошніх работ, выкананых інжынерамі-даследчыкамі аддзела метралогіі, стандартызацыі і выпрабаванняў з выкарыстаннем высокатэхналагічнага абсталявання, - вырашэнне пытанняў выхаду са строю свечак напалу. У працэсе агляду ўнутраных пашкоджанняў награвальнай спіралі былі ўстаноўлены месцы найбольш частых разрываў, праведзена вымярэнне таўшчыні ніцей напальвання і даследаванне ўнутранай геаметрыі. Такія даследаванні даюць магчымасць аператыўна ліквідаваць недахопы і поўнасцю выключыць дэфектнасць дэталей у вытворчасці.
Таксама спецыялісты прасвечваюць на прамысловым тамографе любыя дэталі і камплектуючыя для ўстаранення і папярэджання розных дэфектаў. Праводзяцца агляд гільзаў на наяўнасць і характар трэшчын, паліўных помпаў на наяўнасць дэфектаў ліцейнага характару, метралагічныя вымярэнні адказных унутраных зон і параўнанне іх з чарцяжамі.
"Гэтыя работы маюць вялікае значэнне для павышэння якасці і канкурэнтаздольнасці рухавікоў ММЗ, істотна скарочваюць па часе тэхналагічныя працэсы. Акрамя таго, атрыманне ліцэнзіі МНС на прамысловы камп'ютарны тамограф дае права выкарыстоўваць яго для выканання іншых заказаў", - падкрэслілі ў прэс-службе.
Мінскі маторны завод - вытворца сучасных дызельных, газадызельных, газапоршневых рухавікоў. Спецыялізуецца на распрацоўцы, праектаванні і вытворчасці сучасных трох-, чатырох-, шасці- і васьміцыліндравых рухавікоў. На заводзе выпускаецца больш за 100 мадыфікацый рухавікоў у дыяпазоне магутнасці ад 7 да 330 кВт, прызначаных для ўстаноўкі на сельскагаспадарчую, дарожна-будаўнічую і лесаўборачную тэхніку, аўтамабілі і аўтобусы, энергаўстаноўкі, кампрэсары і іншыя агрэгаты. Рухавікі ММЗ пастаўляюцца на канвееры 49 прадпрыемстваў у Беларусі, краінах СНД і далёкага замежжа, прадукцыя прадаецца ў больш чым 50 краін Еўропы, Азіі, Афрыкі, Паўночнай і Лацінскай Амерыкі. Пры вытворчасці рухавікоў выкарыстоўваюцца камплектуючыя сусветна вядомых кампаній.-0-
