30 кастрычніка, Мінскі раён /Кар. БЕЛТА/. ААТ "Мінскае вытворчае гарбарнае аб'яднанне" вядзе перагаворы аб пастаўках прадукцыі ў Кітай і Індыю. Аб гэтым паведаміла сёння журналістам старшыня канцэрна "Беллегпрам" Таццяна Лугіна па выніках наведвання прадпрыемства прэм'ер-міністрам Беларусі Сяргеем Румасам, перадае карэспандэнт БЕЛТА.
Сяргею Румасу далажылі аб выніках рэалізацыі інвестыцыйнага праекта ў ААТ "МВГА", бягучым стане і перспектывах развіцця прадпрыемства. Прэм'ер-міністр наведаў вытворчыя цэхі і азнаёміўся з абсталяваннем і тэхналагічным працэсам вытворчасці скуры, а таксама з асартыментам прадукцыі. Кіраўнік урада таксама даў даручэнні па вырашэнні праблемных пытанняў.
У ААТ "МВГА" назіраецца рост складскіх запасаў, востра стаіць праблема збыту прадукцыі, што накапілася. "Мы робім акцэнт на Кітай і Індыю, таму што такія аб'ёмы іншыя рынкі, думаю, не паглынуць. Ідуць перагаворы аб пастаўках, - сказала Таццяна Лугіна. - Акрамя таго, нам трэба ўзмацняць камерцыйную службу на прадпрыемстве. На заводзе недастаткова спецыялістаў у гэтай галіне, трэба павялічваць іх колькасць. Іх матывацыя павінна быць праз сістэму прэміравання працы. Калі збытавік выканаў або перавыканаў заданне, ён павінен атрымліваць высокую зарплату".
Прэм'ер-міністр праводзіць маніторынг прадпрыемстваў, якія за апошнія гады прайшлі мадэрнізацыю. ААТ "МВГА" - адно з іх. У снежні 2016 года завяршылася мадэрнізацыя прадпрыемства, якая праводзілася па распараджэнні кіраўніка дзяржавы. Інвестыцыйныя затраты па праекце склалі Br26,558 млн, у тым ліку Br5,996 млн - за кошт уласных сродкаў, Br20,562 млн - за кошт крэдытных рэсурсаў. Укараненне новага тэхналагічнага абсталявання дало магчымасць палепшыць якасць, пашырыць і змяніць структуру асартыменту ў бок павелічэння вытворчасці прадукцыі з высокай дабаўленай вартасцю, мінімізаваць выпуск дубленага паўфабрыкату, што ў сваю чаргу прывяло да зніжэння затрат на вытворчасць і рэалізацыю, расходу хімічных матэрыялаў, а таксама павышэння прадукцыйнасці працы, эканоміі энергарэсурсаў, змяншэння аб'ёму вывозімых на палігон адходаў вытворчасці (мяздры). "Інвестыцыйны праект паказаў сваю эфектыўнасць. Дзякуючы мадэрнізацыі прадпрыемства выпускае канкурэнтаздольную прадукцыю і мае добрыя перспектывы. Але ёсць адно праблемнае пытанне - даволі высокая, на наш погляд, стаўка па валютным крэдыце на рэалізацыю інвестпраекта (9 працэнтаў). Гэта пытанне будзе вырашацца", - падкрэсліла старшыня канцэрна.
Сітуацыя, якая склалася ў 2018-2019 гадах на сусветным рынку па спажыванні і рэалізацыі гарбарных тавараў, значна паўплывала на работу адпаведных арганізацый краіны, у тым ліку ААТ "МВГА". Апошнім часам назіраецца ўстойлівая тэндэнцыя па зніжэнні спажывання такіх тавараў (гатовых і паўфабрыкату) і, як вынік, падзенне іх кошту і скарачэнне экспарту. Асноўная прычына агульнасусветнага спаду на рынку - зніжэнне выкарыстання ў масавай вытворчасці паўсядзённага абутку з натуральных скур, замена іх на сінтэтычныя штучныя матэрыялы. "Зніжаецца запатрабаванасць натуральных скур і ў мэбельшчыкаў. Тое ж самае сёння назіраецца на рынку авіябудавання, аўтамабілебудавання. Магчыма, мы не зусім паспелі падстроіцца па сваіх закупачных цэнах на скуры, па скорасці зніжэння затрат і аптымізацыі выдаткаў", - адзначыла Таццяна Лугіна.
Распрацаваны комплексны план па вырашэнні праблемных пытанняў ААТ "МВГА". Ён уключае ў тым ліку аптымізацыю і рэарганізацыю тэрыторыі прадпрыемства, удасканаленне штатнага раскладу. "Нарміраванне, прадукцыйнасць працы, зоны абслугоўвання, работа з сыравінай і адходамі, прыёмка тавару - задач вельмі шмат. Мы распрацавалі новыя тэхнічныя ўмовы па прыёмцы, каб якасць тавару адпавядала той цане, якую мы плацім мясакамбінатам", - дадала старшыня канцэрна.
ААТ "Мінскае вытворчае гарбарнае аб'яднанне" з'яўляецца адным з самых буйных гарбарных заводаў у Беларусі і адным з найбольш тэхнічна аснашчаных прадпрыемстваў гарбарнай галіны. На прадпрыемстве працуе каля 500 чалавек, а сярэдняя зарплата перасягае Br1 тыс. Завод быў пабудаваны і здадзены ў эксплуатацыю ў 1988 годзе па італьянскім праекце. Вытворчыя магутнасці разлічаны на выпуск 500 млн кв.дм гатовых скур і 200 млн кв.дм гарбарных тавараў са спілку ў год.
Цяпер прадпрыемства выпускае шырокі спектр натуральных гарбарных тавараў з бычынай, каровінай, конскай і свіной сыравіны з прымяненнем хромавага і бясхромавага метадаў дублення, розных колераў і метадаў аддзелкі. Прадукцыя завода можа выкарыстоўвацца для верху і падкладкі абутку, для мэблевай вытворчасці, для вытворчасці галантарэйных вырабаў і адзення, для пратэзаў, аксесуараў і музычных інструментаў.-0-
