28 сакавіка, Мінск /Кар. БЕЛТА/. У Беларусі ўстаноўлены гранічныя максімальныя цэны на сельскагаспадарчую прадукцыю раслінаводства ўраджаю 2019 года, што закупляецца для дзяржаўных патрэб. Адпаведная пастанова Міністэрства сельскай гаспадаркі і харчавання нумар 18 ад 13 сакавіка 2019 года апублікавана сёння на Нацыянальным прававым інтэрнэт-партале, паведамляе БЕЛТА.
Згодна з дакументам, гранічная максімальная цана (без ПДВ) за 1 т ячменю, што пастаўляецца для харчовых мэт, складзе Br232,03, фуражнага ячменю - Br185,81, піваварнага ячменю - Br305,25.
Кошт пшаніцы (у залежнасці ад класа) - ад Br303,78 да Br371,47, фуражнай пшаніцы - Br242,7; жыта, што пастаўляецца для перапрацоўкі на муку, - Br236,65, фуражнага жыта - Br189,89; аўса для харчовых мэт (у залежнасці ад класа) - ад Br170,27 да Br225,71, фуражнага аўса - Br136,43; грэчкі, што пастаўляецца для перапрацоўкі на крупы (у залежнасці ад класа), - ад Br468,9 да Br566,59.
У залежнасці ад класа цана 1 т проса для харчовых мэт - ад Br211,62 да Br231, а для перапрацоўкі на камбікорм і на кармавыя мэты - Br169,24; зерня кукурузы для вытворчасці крухмалу і крухмалапрадуктаў - Br251,78; алейнага семя рапсу для харчовых мэт - Br670, для тэхнічных мэт - Br650.
Кошт 1 т цукровых буракоў устаноўлены на ўзроўні Br65 / Br51,9 (кандыцыйныя/некандыцыйныя); пачаткаў кукурузы для вытворчасці насення гібрыдаў першага пакалення - Br389,64.
Пастанова ўступае ў сілу пасля яе афіцыйнага апублікавання.-0-