5 кастрычніка, Мінск /Кар. БЕЛТА/. Для экспарту харчовай прадукцыі складваецца спрыяльная цэнавая кан'юнктура. Выручка Беларусі ад такіх паставак расце. Аб гэтым заявіла начальнік галоўнага ўпраўлення знешнеэканамічнай дзейнасці Міністэрства сельскай гаспадаркі і харчавання Ксенія Мялешка ў праекце "Па факту: рашэнні Першага" на YouTube-канале БЕЛТА.
Паводле слоў спецыяліста, у гэтым годзе забяспечваецца рост аб'ёмаў вытворчасці прадукцыі сельскай гаспадаркі і, адпаведна, рост аб'ёмаў вытворчасці прадуктаў харчавання. "Складваецца спрыяльная цэнавая кан'юнктура. Гэтыя фактары аказваюць станоўчы ўплыў на рост экспартнай выручкі ад прадуктаў харчавання", - сказала яна.
У прыватнасці, з пачатку 2022 года ў параўнанні з аналагічным перыядам мінулага года выраслі экспартныя продажы мясной прадукцыі: мяса ў разабраным выглядзе, каўбасных вырабаў, мясных кансерваў. Павялічыліся таксама пастаўкі сыроў, рапсавага алею, бульбы.
Што датычыцца сітуацыі ў асобных рэгіёнах Беларусі, то традыцыйна найбольшы ўклад у прырост валютнай выручкі ад экспарту сельгаспрадукцыі забяспечваюць Гродзенская, Мінская і Брэсцкая вобласці.
Геаграфія паставак айчыннай харчовай прадукцыі шырокая і пастаянна прырастае новымі таварамі. Беларусь накіроўвае яе ў краіны СНД, уключаючы Расійскую Федэрацыю і такія аддаленыя яе рэгіёны, як Амурская і Сахалінская вобласці, Прыморскі край. Экспартуецца беларуская прадукцыя і ў краіны азіяцкага рэгіёна, на кітайскі рынак. "У гэтым годзе асноўную долю ў прырост валютнай выручкі на кітайскім рынку забяспечыла мясная прадукцыя", - заўважыла начальнік упраўлення Мінсельгасхарча.
Усяго пастаўкі прадуктаў харчавання з Беларусі ажыццяўляюцца ў больш як 100 краін свету.
"Акрамя таго, што расце колькасць пакупнікоў нашай прадукцыі, мы пашыраем асартымент, гэта значыць наменклатуру тавараў на ўжо асвоеныя рынкі збыту. Напрыклад, у гэтым годзе пачалі пастаўкі масла жывёльнага ў Сербію, у Манголію - тварагу, у Іарданію - марожанага, у Саудаўскую Аравію - згушчанага малака. І гэта толькі асобныя прыклады пашырэння геаграфіі паставак", - падкрэсліла Ксенія Мялешка.
Як заяўляў раней намеснік прэм'ер-міністра Леанід Заяц, да канца гэтага года стаіць задача забяспечыць экспарт беларускай харчовай прадукцыі на ўзроўні $7,8 млрд. Пры гэтым, мяркуючы па дынаміцы паступленняў, ёсць магчымасць пераступіць адзнаку $8 млрд.-0-
