9 чэрвеня, Масква /Эдуард Півавар - БЕЛТА/. Міністэрства прамысловасці Беларусі аналізуе патэнцыяльныя санкцыйныя рызыкі, разглядае магчымасці дыверсіфікацыі, але ў цэлым сітуацыя знаходзіцца пад кантролем. Аб гэтым заявіў журналістам намеснік міністра прамысловасці Дзмітрый Харытончык у кулуарах праведзенага ў пасольстве Беларусі ў Маскве Беларуска-азіяцкага форуму, перадае карэспандэнт БЕЛТА.
"Вядома ж, мы аналізуем магчымыя рызыкі, разглядаем магчымасці дыверсіфікацыі гатовай прадукцыі, таксама нашы прадпрыемствы разглядаюць магчымасці пошуку новых контрагентаў па пастаўках камплектуючых і матэрыялаў на свае канвееры. Таму сітуацыя пад кантролем, і я думаю, што нейкіх значных узрушэнняў нам удасца пазбегнуць", - сказаў намеснік міністра прамысловасці.
Ён падкрэсліў, што нельга гаварыць аб існаванні нейкіх значных праблем у беларускай прамысловасці ў сувязі з санкцыйным націскам з боку краін Захаду. "Мы працуем устойліва, - канстатаваў Дзмітрый Харытончык. - Пакуль усе асноўныя нашы партнёры пацвярджаюць свае абавязацельствы. Мы спадзяёмся, што ўсе заявы, якія былі выказаны краінамі, што ўводзяць санкцыі, усё ж такі ў большай ступені не закрануць бізнес, паколькі бізнес стаіць у баку ад палітыкі і забяспечвае работай грамадзян як краін, што ўводзяць санкцыі, так і нашай краіны".-0-
