Фота з архіва
11 кастрычніка, Шклоўскі раён /Кар. БЕЛТА/. Міністэрства лясной гаспадаркі плануе экспартаваць у 2024 годзе рэкордную колькасць піламатэрыялаў за ўсю гісторыю. Аб гэтым у час рабочай паездкі Прэзідэнта Беларусі Аляксандра Лукашэнкі ў Шклоўскі раён кіраўніку дзяржавы далажыў міністр лясной гаспадаркі Аляксандр Кулік, перадае карэспандэнт БЕЛТА.
За студзень-верасень лесагаспадарчыя ўстановы сістэмы Мінлясгаса рэалізавалі больш за 788 тыс. куб.м, што на 12,5 працэнта вышэй за мінулагоднія вынікі. У міністэрстве разлічваюць па выніках года выйсці на лічбу 1 млн куб.м.
Паводле слоў Аляксандра Куліка, гэта будзе рэкордны паказчык. "У бягучым годзе - я гавару гэта адказна - мы паб'ём рэкорд і паставім мільён кубаметраў піламатэрыялаў на экспарт. У гісторыі такога не было. Максімум да 800 тысяч мы падыходзілі", - заявіў міністр.
Пры гэтым асноўным рынкам збыту, як расказалі ў ведамстве, застаецца Кітай. Сюды экспартуецца каля паловы піламатэрыялаў.
Што датычыцца вартасных выражэнняў, то за студзень-верасень аб'ём экспарту лесапрадукцыі і паслуг склаў $135 млн. Гэты паказчык вырас практычна на 16 працэнтаў. Рэнтабельнасць рэалізаванай прадукцыі, тавараў і паслуг у цэлым складае амаль 20 працэнтаў. Для параўнання: у папярэднім годзе яна была на ўзроўні 10,6 працэнта.
"Кан'юнктура рынку цяпер працуе ў наш бок. Цэны на экспарт добра падняліся, таму цяпер усе ўмовы для нас ёсць", - сказаў Аляксандр Кулік.
"Але нам патрэбна дабаўленая вартасць, ты ж не забывай", - падкрэсліў Прэзідэнт.
"Не могуць жа ўсе мэблю вырабляць. На рынку патрэбны і піламатэрыялы", - заўважыў міністр.
"Зразумела, так. Толькі каб яны (замежныя вытворцы. - Заўвага БЕЛТА) з нашых матэрыялаў потым мэблю не рабілі і нам не везлі", - звярнуў увагу Аляксандр Лукашэнка.-0-
Падпісвайцеся на нас у
