5 снежня, Мінск /Кар. БЕЛТА/. Фонд аплаты працы ў бюджэце вырасце на 16 працэнтаў са студзеня 2023 года. Аб гэтым у эфіры тэлеканала "Беларусь 1" заявіў міністр фінансаў Юрый Селіверстаў, паведамляе БЕЛТА.
Адказваючы на пытанне, як беларусы адчуюць сацыяльную арыентаванасць бюджэту 2023 года, Юрый Селіверстаў адзначыў, што ў першую чаргу гэта паўплывае на рост заработнай платы. "Цяпер ва ўрада ёсць планы аб чарговым павышэнні заработнай платы. Са студзеня фонд аплаты працы плануецца з ростам на 16 працэнтаў у бюджэце. Гэта значыць з 1 студзеня першы крок па павелічэнні тарыфнай стаўкі. Па меры напаўнення даходаў бюджэту мы будзем глядзець, наколькі мы можам больш гэту заработную плату падняць", - сказаў міністр фінансаў.
Ён падкрэсліў: "Ніхто не павышае істотна тарыфы ні на транспарт, ні на ЖКГ, каб грамадзяне не адчулі нейкіх дадатковых ваганняў, у тым ліку інфляцыйных. А гэта ж усё субсідзіруецца з бюджэту".
Юрый Селіверстаў дадаў, што прадоўжыцца будаўніцтва і ўтрыманне сацыяльных аб'ектаў. Ён адзначыў, што сацыяльны складнік нават у некаторай ступені прырасце.-0-