Мінэканомікі: закон абараняе правы работнікаў пры банкруцтве наймальніка

18 ліпеня, Мінск /Кар. БЕЛТА/. Заканадаўства абараняе матэрыяльныя правы работнікаў у выпадку банкруцтва наймальніка. Аб гэтым заявіла сёння намеснік міністра эканомікі Алеся Абраменка, выступаючы на пасяджэнні Нацыянальнага савета па працоўных і сацыяльных пытаннях, паведамілі БЕЛТА ў прэс-службе Мінэканомікі.

Алеся Абраменка падкрэсліла, што аздараўленне або ўрэгуляванне неплацежаздольнасці прадпрыемстваў - асноўная мэта новага закона "Аб урэгуляванні неплацежаздольнасці". У сваім дакладзе яна асаблівую ўвагу ўдзяліла актуальным падыходам да аздараўлення арганізацый, зацверджаным законам.

"Згодна з законам без правядзення мерапрыемстваў па аздараўленні эканамічнымі судамі не будзе адкрывацца справа. Гэта значыць, разглядаючы пытанне аб увядзенні працэдуры неплацежаздольнасці або банкруцтва, эканамічныя суды будуць ацэньваць намаганні і меры, прынятыя арганізацыямі. Гэта датычыцца прадпрыемстваў усіх форм уласнасці, а не толькі дзяржсектара, як было ў папярэднім дакуменце", - падкрэсліла намеснік кіраўніка Міністэрства.

Алеся Абраменка таксама адзначыла, што дзеючае ў краіне заканадаўства максімальна накіравана на абарону правоў работнікаў. "Нормы закона змяшчаюць поўны спектр інструментаў, нацэленых на абарону матэрыяльных правоў работнікаў у выпадку банкруцтва наймальніка", - акцэнтавала ўвагу яна.-0-