12 мая, Мінск /Кар. БЕЛТА/. Экспарт тавараў і паслуг Беларусі ў студзені - сакавіку 2023 года склаў $11,7 млрд - гэта максімальны аб'ём, дасягнуты ў І квартале за апошнія 10 гадоў, паведамілі БЕЛТА ў прэс-службе Міністэрства эканомікі.
У І квартале экспарт тавараў вырас на 12 працэнтаў, або на $1 млрд. Найбольшы ўклад у прырост экспарту забяспечылі спажывецкія тавары (плюс 8,8 працэнтнага пункта). "Па выніках I квартала страты на рынках недружалюбных краін і Украіны былі поўнасцю кампенсаваны ростам экспарту на альтэрнатыўныя рынкі збыту. Найбольшы рост экспарту ў Расію - у 1,6 раза, або на $2,2 млрд", - расказалі ў Мінэканомікі.
Адзначаецца захаванне прафіцыту ў знешнім гандлі ($243 млн), нягледзячы на апераджальны рост імпарту. Дадатнае сальда ў гандлі паслугамі (каля $755 млн) поўнасцю кампенсавала дэфіцыт у гандлі таварамі (прыкладна мінус $512 млн).-0-
