28 лютага, Мінск /Кар. БЕЛТА/. З 2023 года чакаецца актывізацыя заключэння міравых пагадненняў у працэдурах фіназдараўлення прадпрыемстваў. Аб гэтым заявіў дырэктар дэпартамента па санацыі і банкруцтве Юрый Тараканаў, паведамілі БЕЛТА ў прэс-службе Мінэканомікі.
Як адзначыў Юрый Тараканаў, міравое пагадненне саніруемага прадпрыемства з яго крэдыторамі - гэта дзейсны механізм рэструктурызацыі запазычанасці. Аднак да нядаўняга часу абавязковыя плацяжы не маглі быць прадметам грамадзянска-прававых міравых пагадненняў і падатковыя органы не ўдзельнічалі ў іх заключэнні. Як вынік, за 2021-2022 гады было заключана толькі 12 міравых пагадненняў у працэдуры санацыі.
"Адначасова з падрыхтоўкай Закона "Аб урэгуляванні неплацежаздольнасці" ў 2022 годзе праводзілася комплекснае ўдасканаленне падатковага заканадаўства, мэта якога - стварыць максімум магчымасцей "выратавання" нестабільных прадпрыемстваў на раннім этапе, без працяглай судовай працэдуры", - сказаў дырэктар дэпартамента.
Паводле яго слоў, пасля ўнясення ініцыяваных Мінэканомікі дапаўненняў у Падатковы кодэкс падатковыя органы атрымалі права ўдзельнічаць у заключэнні міравых пагадненняў у ходзе ўрэгулявання неплацежаздольнасці. З 1 кастрычніка 2023 года такія органы вызначаны ў якасці адзінага дзяржаўнага крэдытора з кансалідацыяй у яго ў конкурсным вядзенні ўсіх абавязковых плацяжоў. Гэта мера істотна павысіць верагоднасць паспяховай рэабілітацыі прадпрыемстваў.
"Антыкрызісным кіраўнікам неабходна актывізаваць работу па выпрацоўцы і заключэнні міравых пагадненняў. Мінэканомікі разлічвае, што колькасць такіх пагадненняў значна ўзрасце", - адзначыў Юрый Тараканаў.-0-
