22 красавіка, Мінск /Кар. БЕЛТА/. Павышэнне зарплат адвязалі ад росту прадукцыйнасці працы, каб даць магчымасць захавання зарплаты пры зніжэнні вытворчасці. Аб гэтым паведаміў журналістам ва ўрадзе міністр эканомікі Аляксандр Чарвякоў, перадае карэспандэнт БЕЛТА.
"Гэта рашэнне было прынята, каб даць магчымасць кіраўнікам прадпрыемстваў пры неабходнасці зніжэння аб'ёмаў вытворчасці захоўваць узровень заработнай платы", - адзначыў Аляксандр Чарвякоў.
Паводле яго слоў, рашэнне не акажа негатыўнага ўплыву на макраэканамічную збалансаванасць.
"У першую чаргу мы тут ставім у якасці прыярытэту даходы насельніцтва, і ў гэтым выпадку разумеем, што адбудзецца пераразмеркаванне з фонду накаплення ў фонд спажывання. На балансіроўку гэта ніяк не паўплывае: мы менш будзем траціць рэсурсаў на інвестыцыі, больш - на заработную плату", - дадаў міністр.
Як паведамлялася, раней было прадугледжана, што ў дзяржарганізацыях і арганізацыях, у статутным фондзе якіх доля ўласнасці дзяржавы складае больш за 50 працэнтаў, павышэнне зарплаты (дзеючых памераў тарыфных ставак (акладаў), стымулюючых і кампенсуючых выплат) работнікаў дапускаецца толькі пры ўмове суадносін росту прадукцыйнасці працы і заработнай платы больш за 1. Цяпер дзеянне гэтай нормы прыпынена да 31 снежня 2020 года.-0-
