27 жніўня, Мінск /Кар. БЕЛТА/. Міністэрства эканомікі сумесна з аблвыканкамамі падрыхтавала комплексны план развіцця 31 рэгіёна Беларусі, якія адстаюць па ўзроўні сацыяльна-эканамічнага развіцця. Дакумент сёння разглядаецца на пасяджэнні Прэзідыума Савета Міністраў, перадае карэспандэнт БЕЛТА.
"Асноўная задача - падцягнуць адстаючыя рэгіёны да сярэднерэспубліканскага ўзроўню. Гэта задача няпростая. Трэба стварыць умовы не толькі для рэальнага сектара, але і для прыцягнення працоўных рэсурсаў, зніжэння адтоку насельніцтва за кошт стварэння камфортных умоў для жыцця", - заявіў прэм'ер-міністр Сяргей Румас.
Рабочая назва дакумента - план індустрыялізацыі адстаючых у развіцці рэгіёнаў. Аднак кіраўнік урада лічыць, што больш дарэчы гаварыць пра план не індустрыялізацыі, а развіцця. "Паколькі развіццё тэрыторый можа быць звязана не толькі з прамысловасцю, але і са сферай паслуг, у прыватнасці з турызмам, што вельмі актуальна для адстаючых рэгіёнаў", - растлумачыў ён.
У выніку выканання плана з групы адстаючых павінны выйсці 11 рэгіёнаў, яшчэ 5 - блізка наблізіцца да выхаду з яе.
Сяргей Румас папрасіў Мінэканомікі далажыць, які рэальны эфект ад рэалізацыі плана атрымае насельніцтва раёнаў і як гэта паўплывае на ўзровень жыцця людзей.
Акрамя таго, на сённяшнім пасяджэнні выступяць кіраўнікі абласцей, яны растлумачаць, ці сапраўды ўсе прапанаваныя праекты забяспечаны рэальнымі крыніцамі фінансавання і ці не будзе рэалізацыя праектаў спынена на паўдарозе.-0-
