24 студзеня, Мінск /Кар. БЕЛТА/. Міністэрства эканомікі сумесна з Карэйскім інстытутам развіцця правялі ў фармаце анлайн рабочую сустрэчу па праекце KSP 2021/22 "Лічбавая трансфармацыя эканомікі Беларусі: укараненне лепшых практык супрацоўніцтва бізнесу і дзяржаўнага сектара ў галіне лічбавай трансфармацыі прамысловага сектара". Аб гэтым паведамляе БЕЛТА са спасылкай на сайт ведамства.
Удзельнікі паглыблена вывучылі пытанні, звязаныя з запланаванымі на гэты год трыма тэмамі даследаванняў: палітычныя рэкамендацыі па стварэнні і функцыянаванні платформы супрацоўніцтва прамысловага сектара і дзяржорганаў; палітычныя рэкамендацыі па лічбавай трансфармацыі малога і сярэдняга прадпрымальніцтва; планы дзеянняў па лічбавай трансфармацыі праз супрацоўніцтва прамысловага сектара і дзяржорганаў.
"У наступным праектным перыядзе Мінэканомікі чакае ад новага праекта KSP 2021/22 трансферу перадавога карэйскага вопыту дзяржаўна-прыватнага ўзаемадзеяння ў галіне лічбавага развіцця рэальнага сектара эканомікі. Бакі выпрацавалі адзінае меркаванне аб актуальнасці выбраных тэм даследавання для Беларусі, магчымасці і прымянімасці перадавога карэйскага вопыту ў нашай краіне, своечасовасці правядзення работы па падрыхтоўцы планаў дзеянняў (дарожных карт) для ўрада і прамысловай бізнес-супольнасці па лічбавай трансфармацыі, гатоўнасці для лічбавых пераўтварэнняў як з боку вытворчага бізнесу, так і дзяржавы", - падкрэслілі ў прэс-службе ведамства.
Як адзначылі ў міністэрстве, гэта другое запланаванае мерапрыемства па KSP 2021/22 у рамках рэалізацыі трэцяга этапу праектнай дзейнасці Праграмы абмену ведамі (KSP) Рэспублікі Карэя ў Беларусі.
У Мінэканомікі таксама нагадалі, што 29 лістапада 2021 года адбыўся стартавы семінар па афіцыйным адкрыцці праекта KSP 2021/2022, у якім прынялі ўдзел намеснік міністра эканомікі Дзмітрый Ярашэвіч, намеснік міністра сувязі і інфарматызацыі Ганна Рабава, дырэктар ДУ "Беларускі інстытут сістэмнага аналізу і інфармацыйнага забеспячэння навукова-тэхнічнай сферы" Віктар Грышчук, намеснік дырэктара гэтага інстытута па міжнароднай навукова-інавацыйнай рабоце Вольга Навумовіч, саветнік пасольства Рэспублікі Карэя ў Беларусі Нам Гунг Джонг, кіраўнікі профільных падраздзяленняў дзяржорганаў, прамысловых бізнес-саюзаў і асацыяцый, устаноў адукацыі і навукі.-0-
