13 сакавіка, Мінск /Кар. БЕЛТА/. Эфектыўныя механізмы фінансавага аздараўлення забяспечваюць стабільную работу прадпрыемстваў. Такое меркаванне выказаў дырэктар Дэпартамента па санацыі і банкруцтве Юрый Тараканаў, паведамілі БЕЛТА ў прэс-службе Мінэканомікі.
Супрацоўнікі тэрытарыяльных органаў па санацыі і банкруцтве ў лютым гэтага года прынялі ўдзел у судовых пасяджэннях, сходах (пасяджэннях камітэта) крэдытораў і наведалі шэраг прадпрыемстваў у рэгіёнах, якія знаходзяцца ў працэдурах фінансавага аздараўлення. На пасяджэннях эканамічных судоў Мінскай і Віцебскай абласцей заслуханы справаздачы кіраўнікоў і абмеркаваны пытанні прадаўжэння санацыі асобных прадпрыемстваў.
На сходах крэдытораў прааналізаваны справаздачы кіраўнікоў аб ходзе працэдур некаторых арганізацый. Сярод іх Мазырскі аўтарамонтны завод, Завод хімічных вырабаў, ТАА "Прамбудтэхкамлект", ТАА "ПоліПластСэрвіс", ТАА "ГлобаКарт", Бабруйскі гарбарны камбінат і інш. Для стварэння ўмоў для прыняцця эфектыўных і своечасовых кіраўніцкіх рашэнняў вывучаўся вопыт прымянення заканадаўства аб эканамічнай неплацежаздольнасці пры наведванні будаўніча-мантажнага трэста нумар 27, Завода хімічных вырабаў, магілёўскага завода "Строммашына" і ААТ "Магілёўсаюздрук".-0-
