26 снежня, Масква /Эдуард Півавар - БЕЛТА/. Разлікі ў нацыянальных валютах у гандлі Расіі і Беларусі перасягнулі 80 працэнтаў. Аб гэтым паведаміў сёння на прэс-канферэнцыі намеснік міністра эканамічнага развіцця РФ Дзмітрый Вольвач, перадае карэспандэнт БЕЛТА.
Паводле ацэнкі Дзмітрыя Вольвача, Беларусь і Расія ідуць добрымі тэмпамі па рэалізацыі 28 саюзных праграм, якія былі зацверджаны рашэннем Вышэйшага дзяржаўнага савета Саюзнай дзяржавы ў лістападзе 2021 года. Пры гэтым, адказваючы на пытанне аб неабходнасці ўвядзення адзінай валюты, ён сказаў: "Мы яшчэ не да канца рэалізавалі той патэнцыял, які знаходзіцца ў плоскасці развіцця і павелічэння ўзаемных разлікаў у нацыянальных валютах. Прычым гэты трэнд актуальны і для Еўразійскага эканамічнага саюза. Але з Беларуссю дасягнуты, напэўна, найбольш высокія тэмпы і аб'ёмы пераходу ў разліках на нацыянальныя валюты - гэта больш за 80 працэнтаў у таварным абароце. Думаю, што перспектывы яшчэ большыя".
"На сённяшні дзень нашы рэгулятары не бачаць неабходнасці педаліраваць пытанне пераходу на нейкую наднацыянальную і адзіную саюзную валюту, - падкрэсліў намеснік кіраўніка Мінэканамразвіцця РФ. - Нашы нацыянальныя валюты добра спраўляюцца з падтрыманнем і забеспячэннем нашага ўзаемнага тавараабароту, ліквіднасці нашых узаемных таварных абавязацельстваў і іншых міждзяржаўных разлікаў. Думаю, нам ёсць яшчэ над чым папрацаваць для таго, каб наша ўзаемная інфраструктура - фінансавая, плацежная, біржавая - стала яшчэ больш інтэгравана, яшчэ больш гарманічна дазваляла нашым удзельнікам знешнеэканамічнай дзейнасці працаваць як на таварных, так і фінансавых рынках ва ўмовах вельмі збліжанага і гарманізаванага рэгулявання".
"На сённяшні дзень нам ёсць яшчэ над чым папрацаваць з пункту гледжання рэалізацыі магчымасцей максімальна поўнага пераходу ў разліках нацыянальнымі валютамі нашых дзяржаў", - рэзюмаваў Дзмітрый Вольвач.-0-
