12 студзеня, Мінск /Кар. БЕЛТА/. Беларусі і Расіі трэба павялічваць долю ўзаемаразлікаў у нацыянальных валютах. Такое меркаванне карэспандэнту БЕЛТА выказаў доктар эканамічных навук Валерый Байнёў.
Эксперт адзначыў, што ў 2022 годзе адбылася сур'ёзная перабудова ўсёй сістэмы фінансавых адносін у Саюзнай дзяржаве. Беларусь і Расія перайшлі на ўзаемаразлікі ў нацыянальных валютах, каб не залежаць ад ваганняў долара і еўра, спекуляцый на валютных рынках, а таксама ад магчымых новых санкцый.
"Разлікі ў нацыянальных валютах Расіі і Беларусі ў 2022 годзе перавысілі 80 працэнтаў ва ўзаемным гандлі, у тым ліку дзякуючы пачатай рэалізацыі 28 саюзных праграм. Але я лічу, што гэту долю трэба павялічваць. Гандляваць трэба ў валюце краін, у рамках якіх і адбываюцца аперацыі. Нашы нацыянальныя валюты добра спраўляюцца з падтрыманнем і забеспячэннем узаемнага тавараабароту, ліквіднасці ўзаемных таварных абавязацельстваў і іншых міждзяржаўных разлікаў", - адзначыў ён.
Валерый Байнёў звярнуў увагу, што з-за ўведзеных Захадам абмежаванняў адносна аперацый у доларах і еўра павелічэнне долі разлікаў у нацыянальных валютах яшчэ і вымушаны крок.
"Відавочна, што ў рамках Саюзнай дзяржавы мы павінны былі ўжо даўно разлічвацца ў нацыянальных валютах. Ва ўмовах нелегітымнага знешняга націску гэта апраўданы крок. Важна таксама, што ва ўмовах пераарыентацыі беларускага экспарту, перш за ўсё на расійскі рынак, банкі абедзвюх краін распрацоўваюць спецыяльныя праграмы для беларускага бізнесу, каб значна аблягчыць такі пераход. Дарэчы, Беларусь паступова пазбаўляецца ад долараў і еўра ў сваіх золатавалютных рэзервах, арыентуючыся на расійскія рублі і кітайскія юані. Гандаль з партнёрамі з дружалюбных краін таксама пераходзіць на нацыянальныя валюты", - падкрэсліў эканаміст.
Ён звярнуў увагу, што ўведзеныя санкцыі падштурхнулі дзве краіны да больш цеснага ўзаемадзеяння ў розных сферах. Важна, што гэта ўзаемны трэк. Расія зняла пактычна ўсе абмежаванні на пастаўкі беларускай прадукцыі, аператыўна вырашаюцца пытанні, па якіх доўгія гады не маглі знайсці развязку. "Гэта ў першую чаргу цэны на энерганосьбіты. Упершыню за ўсю гісторыю адносін яны будуць зафіксаваны на тры гады. А гэта пэўная стабільнасць, і ўрад Беларусі ў сваіх макраэканамічных разліках цяпер можа зыходзіць з канкрэтнай лічбы, - адзначыў ён. - Паводле папярэдніх ацэнак, 2022-і стане рэкордным па аб'ёме ўзаемнага гандлю паміж краінамі".
Ключавым імпульсам развіцця інтэграцыі Беларусі і Расіі паслужыла прыняцце дэкрэта Вышэйшага дзяржаўнага савета, які зацвердзіў 28 саюзных праграм. Гэта беспрэцэдэнтны па глыбіні пакет дакументаў, у першую чаргу галіновага ўзаемадзеяння, які ахапіў практычна ўсе сферы з акцэнтам на эканамічны складнік.
"Прыняцце саюзных праграм робіць эканоміку Беларусі і Расіі практычна абароненай. Напрыклад, інтэграцыя ў фінансавай сферы прадугледжвае дасягненне супастаўнага і ўстойліва нізкага ўзроўню інфляцыі, стварэнне падобных фінансавых умоў для суб'ектаў гаспадарання ў абедзвюх краінах, гарманізацыю фінансавага і падатковага заканадаўства. А ў цэлым, паводле розных ацэнак, краіны ўжо рэалізавалі больш за 67 працэнтаў запланаванага 28 саюзнымі праграмамі", - рэзюмаваў доктар эканамічных навук.-0-
