18 ліпеня, Магілёў /Кар. БЕЛТА/. Фарміраванне мехатрадаў, прыцягненне людзей і тэхнікі з абласнога цэнтра, перакідка камбайнаў пры неабходнасці - старшыня Магілёўскага аблвыканкама Анатоль Ісачанка на селектарнай нарадзе па пытаннях уборачнай кампаніі 2025 года далажыў кіраўніку дзяржавы аб палявых работах у рэгіёне, перадае карэспандэнт БЕЛТА.
Як адзначыў Анатоль Ісачанка, гаспадаркамі Магілёўскай вобласці ўжо ўбрана 67 працэнтаў ад агульнай плошчы азімага ячменю. Валавы збор чакаецца на 30 працэнтаў вышэйшы за мінулагодні. "Выбарачна пачалі ўборку азімага рапсу, церабленне лёну, адначасова вядзём нарыхтоўку травяных кармоў, - расказаў Анатоль Ісачанка. - Масавую ўборку збожжавых і зернебабовых культур пачнём праз 7-10 дзён".
Улічваючы асаблівасці бягучага года, у рэгіёне прыняты шэраг мер. "Сфарміравалі 14 механізаваных звёнаў, у склад якіх увайшло 36 камбайнаў і машыны на адвозку збожжа. Гэта дасць магчымасць аператыўна аказваць дапамогу ва ўборцы збожжавых культур сельгасарганізацыям, у якіх высокая нагрузка, - адзначыў Анатоль Ісачанка. - Хачу выказаць словы ўдзячнасці міністру ўнутраных спраў, міністру па надзвычайных сітуацыях - мы сфарміравалі 9 экіпажаў з ліку супрацоўнікаў упраўлення па надзвычайных сітуацыях і 10 - з супрацоўнікаў упраўлення ўнутраных спраў. Сёння ўжо частка камбайнаў пайшла і працуе".
Для правядзення тэхнічнага абслугоўвання камбайнаў у рэгіёне стварылі 17 рамонтных звёнаў на базе арганізацый холдынга "Аграмашсэрвіс". Яны размешчаны не толькі ў Магілёве, але таксама ў Бабруйскім, Клічаўскім раёнах для аператыўнага рамонту", - адзначыў у час даклада Анатоль Ісачанка.
Старшыня Магілёўскага аблвыканкама таксама адзначыў, што праблем па збожжы і яго дапрацоўцы няма - у вобласці ўсё прадумалі. Калі падчас уборачнай кампаніі якой-небудзь гаспадарцы спатрэбіцца дапамога - у рэгіёне ўжо адпрацаваны механізм перакідкі камбайнаў з паўднёвых раёнаў, якія звычайна крыху раней завяршаюць палявыя работы.
Анатоль Ісачанка выказаўся і па праблемных пытаннях. Сярод іх - гатоўнасць збожжаўборачнай тэхнікі і сушыльных комплексаў, наяўнасць у тэхнікі тэхагляду. "Гатоўнасць збожжаўборачных камбайнаў на сённяшні дзень 95 працэнтаў, на панядзелак будзе 97 працэнтаў. Па зернесушыльных комплексах - на 97 працэнтаў таксама выйдзем да панядзелка. Тэхагляд - 91 працэнт пройдзены, - сказаў старшыня аблвыканкама. - Аўтатранспарту на адвозцы збожжа мы прыцягнулі 285 адзінак. Што датычыцца забяспечанасці механізатарскімі кадрамі, з арганізацый горада прыцягнута 150 чалавек. Іншых праблем, якія патрабуюць вырашэння, у вобласці няма, вобласць гатова".
Аляксандр Лукашэнка пацікавіўся, ці запушчаны ў работу мадэрнізаваны нядаўна камбікормавы завод у Шклове. Гэтай работай займалася Кіраўніцтва справамі Прэзідэнта, у чыім веданні знаходзіцца прадпрыемства. "Ён ужо прыняў першыя 2 тыс. т збожжа, ужо сушыць", - адказаў Анатоль Ісачанка. Тут жа, адзначыў старшыня аблвыканкама, прыводзяць у парадак мясцовы льнозавод і сельгастэхніку - важнае звяно для сельскай гаспадаркі.
Прэзідэнт нагадаў аб сваім патрабаванні, што завод павінен працаваць і ў інтарэсах іншых сельгаспрадпрыемстваў, а не толькі падпарадкаваных Кіраўніцтву справамі.
Асаблівы акцэнт Аляксандр Лукашэнка зрабіў на аднаўленні ў раёнах паўнацэннай работы райаграсэрвісаў на ўзор Шклова. Да гэтых работ падключаны і мясцовыя будаўнікі. Гэты факт Прэзідэнт таксама пазітыўна ацаніў.
"Што датычыцца райаграсэрвісу - яны (такія прадпрыемствы. - Заўвага БЕЛТА) абсалютна запатрабаваны, пачынаючы ад звёнаў і заканчваючы рамонтамі", - адзначыў Анатоль Ісачанка.
Ён таксама прывёў у прыклад работу з магілёўскім "Аграмашсэрвісам". "Спісаныя камбайны мы аддаём на "Аграмашсэрвіс", разбіраем на запчасткі, прыводзім іх у парадак і прадаём. У мінулым годзе прадалі сялянам дэталей на аднаўленне камбайнаў на суму амаль Br2 млн, у гэтым годзе ўжо на Br600 тыс. Працэс ідзе, таму ні адна запчастка не прападае, там спецыялісты працуюць", - падагульніў Анатоль Ісачанка.-0-
Падпісвайцеся на нас у
