8 студзеня, Мінск /Кар. БЕЛТА/. Плацежная сістэма Mastercard зменіць свой лагатып, з якога будзе выключана яе назва. Такая інфармацыя размешчана на сайце Mastercard, паведамляе БЕЛТА.
Лагатып плацежнай сістэмы будзе ўяўляць сабой толькі перакрыжаваныя чырвоны і жоўты кругі, якія будуць выкарыстоўвацца як у фізічным, так і лічбавым свеце, а таксама на асноўных спонсарскіх аб'ектах.
Як адзначыў дырэктар па маркетынгу і камунікацыях Mastercard Раджа Раджаманар, пераасэнсаванне ў эпоху лічбавых тэхналогій патрабуе прастаты. "Паколькі больш за 80 працэнтаў людзей спантанна распазналі сімвал Mastercard без слова "mastercard", мы гатовы зрабіць наступны крок у развіцці нашага брэнда", - дадаў ён.
Чырвоны і жоўты кругі былі адметнай рысай брэнда Mastercard ужо больш за 50 гадоў. Гэта глабальная сетка апрацоўкі плацяжоў аб'ядноўвае спажыўцоў, фінансавыя ўстановы, кампаніі ў больш як 210 краінах і тэрыторыях.-0-