11 жніўня, Мінск /Кар. БЕЛТА/. Міністр антыманапольнага рэгулявання і гандлю Беларусі Уладзімір Калтовіч расказаў журналістам, як міністэрства плануе далей дзейнічаць у пытанні дзяржрэгулявання цэн на сацыяльна значныя тавары, перадае карэспандэнт БЕЛТА.
Кіраўнік ведамства нагадаў, што ў ліпені рэгуляванне было прадоўжана яшчэ на 90 дзён. "Пакуль мы маем намер прадоўжыць рэгуляванне. Да канца года такія меры застануцца. Гэта дае свой вынік. Калі ў цэлым на рынку свабодных цэн (гэта значыць цэн, якія не рэгулююцца дзяржавай) тэмп росту за апошнія 12 месяцаў склаў 3,7 працэнта, то па рэгулюемых сацыяльна значных таварах - 2,4 працэнта. У гэтым годзе дзякуючы такім мерам мы дасягнулі зніжэння цэн на асноўныя сацыяльна значныя тавары", - падкрэсліў міністр.
Разам з тым Уладзімір Калтовіч адзначыў, што само цэнавае рэгуляванне мае вынік толькі пры ўмове яго кароткатэрміновага прымянення - тэрмінам не больш за год. "Усё, што за рамкамі года, мы бачым, што гэта прыводзіць да перакосаў, церпяць і вытворцы, і гандаль. Таму пасля заканчэння года вельмі ўважліва будзем ставіцца да далейшага рэгулявання ў нейкіх аб'ёмах", - сказаў ён.
"Тым не менш сацыяльна значныя тавары - гэта прадмет увагі нумар адзін. Калі будуць неспрыяльныя ўмовы, то рэгуляванне мы пакінем і ў наступным годзе", - запэўніў міністр.
Уладзімір Калтовіч нагадаў, што прагноз інфляцыі ў бягучым годзе складае 5 працэнтаў. "Ёсць падставы гаварыць аб тым, што гэты прагноз будзе выкананы. На сённяшні дзень мы адстаём ад прагнозу на 0,1 працэнта. Гэта значыць інфляцыя крыху вышэйшая, чым мы прагназавалі па выніках сямі месяцаў", - адзначыў ён. Асноўная прычына такой сітуацыі ў тым, што вясной на фоне пандэміі адбылося скарачэнне рынкаў, павялічыўся попыт, часам да ажыятажу, на некаторыя прадукты харчавання. Тым не менш прынятыя меры па рэгуляванні цэн на сацыяльна значныя тавары далі вынік і дазволілі стрымаць інфляцыю.
"Усяго мы на гэты момант рэгулюем 20 таварных груп. Гэта 50 працэнтаў ад тавараабароту прадуктаў харчавання - дастаткова вялікая ўдзельная вага, якая падлягае рэгуляванню. Гэта дало свой вынік", - адзначыў міністр.
Ён дадаў, што фактычна ў Беларусі да канца трэцяга квартала года была аб'яўлена кампанія "Стоп цэны". Шэрагу прадпрыемстваў, уключаючы натуральныя манаполіі, адрасавана просьба не павялічваць цэны. "Па чацвёртым квартале, калі мы ўвойдзем у трэнд і будзем бачыць, што ёсць магчымасць, то мы зможам разглядаць на асобныя пазіцыі павышэнне тарыфаў", - сказаў кіраўнік ведамства.
Як паведамлялася, пастановай Міністэрства антыманапольнага рэгулявання і гандлю ад 14 ліпеня 2020 года нумар 48 прадоўжана дзеянне пастановы МАРГ аб рэгуляванні цэн на сацыяльна значныя тавары ад 15 красавіка 2020 года нумар 30. Дзеянне пастановы прадоўжана з 90 да 180 дзён.
У гэты спіс уваходзяць рыба, сметанковае масла, сланечнікавы і рапсавы алей, пшанічная мука, соль харчовая, рыс белы шліфаваны, крупы манныя і прасяныя, аўсяныя камякі, макарона, хлеб, ялавічына, свініна, мяса курэй і куранят-бройлераў, яйкі, малако, кефір, смятана, тварог, сыр, дзіцячае харчаванне, свежыя бульба, буракі, морква, капуста белакачанная, цыбуля рэпчатая, агуркі, памідоры, яблыкі, а таксама чай чорны байхавы.
Мера накіравана перш за ўсё на папярэджанне завышэння цэн і забеспячэнне даступнасці для насельніцтва жыццёва важных прадуктаў.-0-
