25 лютага, Брэст /Кар. БЕЛТА/. Міністэрства антыманапольнага рэгулявання і гандлю мае намер узмацніць меры супраць нядобрасумленнай канкурэнцыі на спажывецкім рынку. Аб гэтым заявіў сёння ў Брэсце кіраўнік ведамства Уладзімір Калтовіч, перадае карэспандэнт БЕЛТА.
На нарадзе, у якой прынялі ўдзел прадстаўнікі вялікіх гандлёвых арганізацый, вытворцаў рэгіёна, размова ішла пра дадатковыя меры па абароне ўнутранага рынку. У прыватнасці, уздымалася пытанне аб нездаровай канкурэнцыі, што ўзнікла са з'яўленнем прадпрыемстваў нізкіх цэн - так званых жорсткіх дыскаўнтараў.
"У нас не забаронены ніводны фармат гандлю. Мы не супраць жорсткіх дыскаўнтараў. У нас толькі адно патрабаванне - калі ласка, выконвайце заканадаўства. Але мы бачым парушэнні асартыментнага пераліку, у арганізацыі гандлю (прадастаўленне інфармацыі пакупніку, таварнага суседства, санітарнага парадку). Гэта выклікае нараканні не толькі ў пакупнікоў, але і канкурэнтаў. У сувязі з гэтым сумесна з Дзяржстандартам, Міністэрствам аховы здароўя мы будзем прымаць адпаведныя меры", - сказаў міністр.
У апошнія гады назіраецца рост гандлёвых сетак з замежным капіталам. Паводле даных Нацыянальнага статыстычнага камітэта, вялікія гандлёвыя сеткі ў долі тавараабароту ў рэспубліцы займаюць 52 працэнты, а ў долі харчовага тавараабароту - 72 працэнты. Між тым агульны аб'ём айчынных тавараў у сетках, якія займаюць дамінуючае становішча на рынку, у 2019 годзе склаў 60,9 працэнта. У тым ліку па прадуктовых сетках - 73,2 працэнта (пры норме 80 працэнтаў), нехарчовых - 24 працэнты.
"У нас ёсць усе падставы для ўвядзення больш строгіх мер рэагавання. Самымі крайнімі могуць быць аднаўленне ліцэнзавання рознічнага гандлю з патрабаваннем давядзення долі айчынных тавараў да ўзроўню нацыянальнай харчовай бяспекі. Ураду могуць быць дадзены паўнамоцтвы на распрацоўку парадку прымянення скідак суб'ектамі гандлю. Прадугледжваецца таксама ўстанаўленне адказнасці за парушэнне патрабаванняў заканадаўства аб гандлі, прадастаўленне МАРГ, Міністэрству аховы здароўя і Дзяржстандарту паўнамоцтваў правядзення пазапланавых праверак і прыпынення работы аб'ектаў", - пералічыў магчымыя меры Уладзімір Калтовіч.
"Нашы намаганні ў сакавіку-красавіку будуць накіраваны на тое, каб усталяваць справядлівасць і каб усе дзейнічалі па адных правілах. Мы пастараемся гэта зрабіць у максімальна сціслыя тэрміны разам з нашымі ўпраўленнямі па абласцях", - рэзюмаваў кіраўнік МАРГ.-0-
