24 красавіка, Мінск /Кар. БЕЛТА/. Міністэрства антыманапольнага рэгулявання і гандлю Беларусі і Міжнародная фінансавая карпарацыя (IFC) падпісалі пагадненне аб супрацоўніцтве, паведамілі БЕЛТА ў МАРГ.
У якасці стратэгічнага напрамку супрацоўніцтва МАРГ і IFC вызначана падрыхтоўка і рэалізацыя праграмы развіцця канкурэнцыі ў Беларусі і дарожных карт па развіцці канкурэнцыі ў асобных галінах эканомікі. "Мэта праграмы - фарміраванне і развіццё канкурэнтнага асяроддзя, прыцягненне інвестыцый, што ў рэшце рэшт паслужыць дадатковым імпульсам для ўстойлівага развіцця эканомікі Беларусі ў доўгатэрміновай перспектыве", - растлумачылі ў МАРГ.
Акрамя таго, пагадненнем зацверджаны план мерапрыемстваў, які прадугледжвае падрыхтоўку даных і разлік для Беларусі індэкса стану канкурэнцыі ў ключавых галінах, правядзенне работ па ўдасканаленні антыманапольнага заканадаўства з улікам міжнароднага вопыту, падрыхтоўку рэкамендацый па ўдасканаленні галіновага заканадаўства. Прадугледжана распрацоўка методыкі ацэнкі наступстваў прыняцця нарматыўных прававых актаў на ўмовы канкурэнцыі, навучальныя мерапрыемствы ў галіне канкурэнцыі і антыманапольнага рэгулявання для шырокага кола слухачоў.
Тэрмін дзеяння пагаднення - да 31 снежня 2021 года.
Міжнародная фінансавая карпарацыя - арганізацыя Групы сусветнага банка, вялікі глабальны інстытут развіцця, што факусіруецца на падтрымцы прыватнага сектара ў краінах з рынкам, які развіваецца. Агульная сума фінансавання, прадастаўленага IFC у час інвестыцыйнай дзейнасці ў Беларусі, склала $760 млн. IFC таксама аказвае кансультацыйнае садзейнічанне ўраду Беларусі, дзяржорганам і арганізацыям, прыватнаму бізнесу па пытаннях паляпшэння інвестыцыйнага клімату, удасканалення дзелавога асяроддзя і развіцця прыватнага сектара.-0-
