22 студзеня, Верхнядзвінскі раён /Кар. БЕЛТА/. Для краіны важна ўвесці ў эксплуатацыю комплекс запаволенага каксавання (КЗК) на "Нафтане", таму што праз павелічэнне глыбіні перапрацоўкі і выпуску нафтапрадуктаў мы кампенсуем страты ад расійскага падатковага манеўру. Аб гэтым заявіў журналістам прэм'ер-міністр Беларусі Раман Галоўчанка пасля наведвання нафтапрамысловага прадпрыемства, перадае карэспандэнт БЕЛТА.
Кіраўнік урада адзначыў, што КЗК - аб'ект вельмі складаны і яго будаўніцтва зацягнулася на некалькі гадоў. Тым не менш ёсць падставы лічыць, што комплекс пачне працаваць у гэтым годзе. "Плануем у маі скончыць будаўніча-мантажную частку і неадкладна пачаць пуска-наладку. У лепшым выпадку да пачатку чацвёртага квартала гэтага года, а калі складанасці ўзнікнуць, то да канца года, маем намер выйсці на атрыманне першага прадукту ад гэтай устаноўкі. Для нас гэта важна, таму што праз павелічэнне глыбіні перапрацоўкі і выпуску нафтапрадуктаў мы кампенсуем страты ад падатковага манеўру", - адзначыў Раман Галоўчанка.
Паводле яго слоў, каб пастаянна кантраляваць ход рэалізацыі інвестпраекта і пазбягаць адставанняў, кожныя два тыдні на "Нафтане" працуе штаб пад кіраўніцтвам міністра архітэктуры і будаўніцтва Руслана Пархамовіча і старшыні канцэрна "Белнафтахім" Андрэя Рыбакова.
Журналісты таксама пацікавіліся меркаваннем прэм'ер-міністра аб праграме сацыяльна-эканамічнага развіцця Беларусі на 2021-2025 гады. У прыватнасці, аб ідэі стварэння дзяржкарпарацыі ў сельгасмашынабудаванні. Раман Галоўчанка падкрэсліў, што гэта прапанова знаходзіцца ў прапрацоўцы. "Стварэнне дзяржкарпарацый - рух у правільны бок. Гэта аб'яднанне тэхналагічных, інжынерных і маркетынгавых патэнцыялаў прадпрыемстваў. Цяпер важна мець магутныя структуры, якія могуць прыцягваць значныя фінансавыя патокі і крэдытныя рэсурсы. Па сутнасці, гэта больш глыбокая ступень інтэграцыі ў параўнанні з існуючымі холдынгамі. Але патрэбны час, каб поўнасцю ацаніць увесь маштаб і прыняць правільныя кіраўніцкія рашэнні", - дадаў кіраўнік урада.
У сацыяльна-эканамічным развіцці краіны на пяцігодку ёсць некалькі галоўных вектараў. Першае - гэта стаўка на традыцыйную галіну прамысловасці - нафтахімічную. Дзяржава будзе ў яе ў далейшым інвесціраваць. "Але ў той жа час у прыярытэце развіццё рэгіёнаў. Канцэнтруючы працоўныя рэсурсы і прадукцыйныя сілы вакол вялікіх гарадоў, мы не павінны забываць аб раёнах. Вось у адным з іх - Верхнядзвінскім - сёння пабывалі. Сельскагаспадарчы рэгіён з невялікай прамысловасцю. З улікам ільгот, якія ўжо ёсць, трэба ў кожным населеным пункце развіваць вытворчасць", - рэзюмаваў Раман Галоўчанка.-0-
