24 чэрвеня, Мінск /Кар. БЕЛТА/. У праекце абноўленага КоАП падрабязна распісаны рэгламент работы з непаўналетнімі. Калі ў дзеючым кодэксе іх адказнасці прысвечаны ўсяго адзін артыкул, то ў новым - цэлая глава. На гэта ў час чарговага пасяджэння праекта БЕЛТА і Беларускага інстытута стратэгічных даследаванняў "Экспертнае асяроддзе" "Адміністрацыйны кодэкс. Слухаць і чуць людзей" звярнула ўвагу старшыня Пастаяннай камісіі па заканадаўстве Палаты прадстаўнікоў Святлана Любецкая.
Дэпутат адзначыла, што ў главе аб проціпраўных дзеяннях непаўналетніх вельмі падрабязна распісаны рэгламент работы службовых асоб, у тым ліку ў частцы растлумачэння падлетку супрацьпраўнасці яго паводзін. "Службовая асоба, у поле зроку якой трапіў непаўналетні, будзе абавязана растлумачыць, што дзіця зрабіла не так, да якіх наступстваў гэта вядзе, як яно павінна сябе паводзіць. Сацыяльная функцыя дзяржавы на прыкладзе распрацоўкі гэтых праектаў кодэкса, думаю, рэалізавана ў поўнай меры", - сказала Святлана Любецкая.
У главе праекта КоАП аб адказнасці падлеткаў значнае месца адводзіцца прафілактыцы. "Калі дзіця першы раз учыніла правапарушэнне, то віды адказнасці мінімізаваны і зведзены ў большай ступені да папярэджанняў, прафілактыкі, растлумачэння, пераканання", - дадала дэпутат. Яна выказала надзею, што прагрэсіўныя падыходы, якія сёння закладваюцца ў кодэксы, будуць належным чынам успрыняты моладдзю.
Адна з задач распрацоўшчыкаў новых КоАП і ПВКоАП была ў тым, каб знізіць карны ўхіл адміністрацыйнага заканадаўства. Разлік зроблены на тое, што чалавек, які атрымлівае папярэджанне, у далейшым зменіць свае паводзіны і паўторнага правапарушэння не ўчыніць. Дэпутат падкрэсліла: ідэя не ў тым, каб праваадносіны ў гэтай сферы мелі характар усёдазволенасці, а ў тым, каб у іх стала больш разумнага дыялогу, узаемадзеяння.-0-
