22 красавіка, Мінск /Кар. БЕЛТА/. Усе будаўнічыя нормы павінны быць прыняты ў Беларусі да канца года. Аб гэтым заявіў намеснік прэм'ер-міністра Уладзімір Кухараў на пасяджэнні Міжведамаснага савета па пытаннях архітэктуры, горадабудаўніцтва і будаўніцтва, дзе былі ўзгоднены чарговыя будаўнічыя нормы і правілы, паведамілі БЕЛТА ў прэс-службе Міністэрства архітэктуры і будаўніцтва.
Цяпер вядзецца работа па рэфармаванні заканадаўства ў сферы архітэктуры, горадабудаўніцтва і будаўніцтва. Згодна з указам ад 5 чэрвеня 2019 года нумар 217 у краіне ўводзяцца новыя віды тэхнічных нарматыўных прававых актаў: будаўнічыя нормы (СН), якія ўключаюць патрабаванні ў галіне бяспекі будынкаў і збудаванняў, прызначаныя для абавязковага прымянення, і будаўнічыя правілы (СП), якія забяспечваюць спосабы дасягнення будаўнічых норм.
"Увядзенне такіх актаў змяняе падыходы да нарміравання. Так, новая сістэма з'яўляецца больш прагрэсіўнай і гібкай. Будаўнічыя нормы ўстанаўліваюць выключна абавязковыя параметры бяспекі, што дае магчымасць зняцця тэхнічных бар'ераў пры пашырэнні выкарыстання інавацыйных матэрыялаў і тэхналогій, праектных рашэнняў", - адзначылі ў прэс-службе.
Як растлумачыла начальнік галоўнага ўпраўлення горадабудаўніцтва, праектнай, навукова-тэхнічнай і інавацыйнай палітыкі Міністэрства архітэктуры і будаўніцтва Вольга Верамей, будаўнічыя нормы і правілы дадуць магчымасць павысіць якасць праектнай дакументацыі і эфектыўнасць будаўніцтва, аптымальна спалучаць традыцыйныя і прагрэсіўныя канструкцыі, вырабы, перадавыя тэхналогіі пры абавязковым захаваннi норм бяспекі. Новыя дакументы "развяжуць" рукі праекціроўшчыкам, дадуць магчымасць выбіраць розныя інавацыйныя матэрыялы і спосабы іх прымянення, самае галоўнае - каб яны адпавядалі ўсіх параметрам бяспекі.
Будаўнічыя нормы і правілы поўнасцю адпавядаюць еўрапейскім падыходам і стандартам. Дзеючыя цяпер тэхнічныя нарматыўныя прававыя акты іншых дзяржорганаў у частцы, што ўстанаўлівае абавязковыя патрабаванні пры праектаванні і будаўніцтве аб'ектаў, будуць прызнавацца страціўшымі сілу пасля ўвядзення ў дзеянне будаўнічых норм і правіл.
На пасяджэнні міжведамаснага савета ўзгоднены будаўнічыя правілы "Мантаж вонкавых газаправодаў" і "Дарожныя адзенні цвёрдага і паўцвёрдага тыпу аўтамабільных дарог", будаўнічыя нормы "Забеспячэнне тэхнічнай абароненасці будынкаў і збудаванняў".
Цяпер Мінбудархітэктуры зацверджаны 32 будаўнічыя нормы і 1 будаўнічае правіла. Дакументы датычацца пытанняў бяспекі ўзвядзення жылых і грамадскіх будынкаў, у тым ліку ў частцы праектавання будаўнічых канструкцый і ўздзеяння на іх. Прыняты нарматывы па ацяпленні, вентыляцыі і кандыцыянаванні паветра, уладкаванні дахаў, праектаванні трамвайных і тралейбусных ліній, а таксама станцый тэхнічнага абслугоўвання, складоў нафты і нафтапрадуктаў.
У 2020 годзе плануецца зацвердзіць яшчэ каля 40 тэхнічных нарматыўных прававых актаў.-0-
