6 мая, Мінск /Кацярына Марковіч - БЕЛТА/. ААТ "Крычаўцэментнашыфер" у студзені-сакавіку 2020 года павялічыла экспарт прадукцыі на 40,5 працэнта да $4,267 млн. Аб гэтым паведаміў карэспандэнту БЕЛТА генеральны дырэктар прадпрыемства Уладзімір Карчэўскі.
Паводле яго інфармацыі, у I квартале "Крычаўцэментнашыфер" павялічыў аб'ём вытворчасці таварнай прадукцыі ў фактычных адпускных цэнах на 21,9 працэнта - амаль да Br37,5 млн. За гэты перыяд спажыўцам адгрузілі больш за 302 тыс. т цэменту, тэмп росту продажаў цэменту ў параўнанні з аналагічным перыядам мінулага года дасягнуў паказчыка 122,3 працэнта. Запасы гатовай прадукцыі ў параўнанні з сярэднямесячным аб'ёмам вытворчасці склалі 43,7 працэнта, у студзені-сакавіку 2019 года гэты паказчык быў на ўзроўні 61 працэнта. У асноўны капітал за I квартал гэтага года было інвесціравана Br614 тыс. Выкананы мэтавы паказчык па энергазберажэнні (мінус 2). Матэрыялаёмістасць прадукцыі зніжана на 12,7 працэнта, што сведчыць аб эфектыўнасці выкарыстання матэрыяльных рэсурсаў на прадпрыемстве. Выручка ад продажаў за гэты перыяд склала Br41,3 млн.
За студзень-сакавік 2020 года загрузка вытворчых магутнасцей склала 78,2 працэнта. Гэта адзін з вядучых паказчыкаў, якія характарызуюць работу прадпрыемства, паколькі з'яўляецца індыкатарам прадукцыйнасці і дае магчымасць ацаніць эфектыўнасць тэхналогій і метадаў работы, што выкарыстоўваюцца, выявіць праблемы з рацыянальнай эксплуатацыяй машын, адзначыў кіраўнік прадпрыемства.
"Па выніках работы за першыя тры месяцы 2020 года рост прыбытку быў запланаваны ў памеры Br598 тыс., а фактычна склаў плюс Br3,9 млн. Вырасла і рэнтабельнасць продажаў. Памер прыбытку на аднаго работніка паказвае, наколькі эфектыўна і прыбыткова прадпрыемства вядзе дзейнасць. Рост гэтага паказчыка ўказвае на станоўчыя тэндэнцыі ў развіцці акцыянернага таварыства. Так, выручка на аднаго сярэдняспісачнага работніка дасягнула Br48,7 тыс., тэмп росту - 139,8 працэнта", - паведаміў Уладзімір Карчэўскі. Генеральны дырэктар падкрэсліў, што важнейшая ўмова павышэння эфектыўнасці вытворчасці - апераджальны рост прадукцыйнасці працы ў параўнанні з ростам сярэдняй заработнай платы. Каэфіцыент тэмпу росту прадукцыйнасці працы да росту сярэднямесячнай зарплаты на гэтым прадпрыемстве па выніках I квартала бягучага года склаў 1,19 працэнта, што дае магчымасць павышаць памер заработнай платы. У акцыянерным таварыстве сярэднямесячная зарплата за студзень-сакавік 2020 года склала Br1042,5 (тэмп росту - 117,7 працэнта), за сакавік - Br1262,4.
"Прадпрыемства працуе стабільна. Цяпер перайшлі да планавага рамонту, але перад гэтым стварылі неабходны для вытворчасці цэменту запас клінкеру. Таму часовае прыпыненне вытворчасці клінкеру ніяк не паўплывала на продаж прадукцыі. Стабільна адгружаем спажыўцам па 5 тыс. т цэменту ў суткі, а ў красавіку даходзіла і да 6 тыс. т. Падаткі дзяржаве выплачаны, зарплата поўнасцю і своечасова выплачана. Калектыў працуе, сур'ёзных праблем няма. Можна зрабіць выснову, што, нягледзячы на цяперашнія цяжкасці, звязаныя з распаўсюджваннем каранавіруснай інфекцыі, попыт на прадукцыю не змяншаецца", - пракаменціраваў вынікі работы генеральны дырэктар акцыянернага таварыства Уладзімір Карчэўскі.
Дадатную дынаміку развіцця вытворчасці дэманструюць і філіялы акцыянернага таварыства, сярод іх "Баранавіцкі КЖБК", "Завод зборнага жалезабетону нумар 3 г. Віцебска", "Маладзечнажалезабетон", "Наваполацкжалезабетон" і "Рагачоўжалезабетон". "Уклад філіялаў у кансалідаваную выручку ААТ склаў 32,6 працэнта, аб'ём прамысловай вытворчасці склаўся за I квартал на ўзроўні Br17 млн і павялічыўся на 27 працэнтаў у параўнанні з аналагічным перыядам мінулага года. З 5 філіялаў 3 атрымалі чысты прыбытак, а, паводле прагнозаў, за паўгоддзе ўсе філіялы выйдуць на ўстойлівы дадатны рэзультат", - паведаміў генеральны дырэктар.
Уладзімір Карчэўскі таксама расказаў, што прадпрыемства пастаянна развіваецца, уводзяцца новыя аб'екты. У пачатку красавіка гэтага года завяршылася рэканструкцыя павышанага пуці. "Работы па рэканструкцыі аб'екта пачаліся ў чэрвені 2019 года, а ў сакавіку 2020-га ўжо скончылі асноўныя работы. Дзякуючы гэтаму выключана магчымасць змешвання прымаемых сыпучых грузаў (каменны вугаль, торфабрыкет) і наладжана іх сартаванне для выканання тэхналагічнай дысцыпліны. Прымыняемыя інжынерныя і тэхналагічныя рашэнні дадуць магчымасць скараціць час выкарыстання чыгуначных вагонаў пад грузавымі аперацыямі, а значыць - павялічыць абарачальнасць вагонаў, - расказаў ён. - Прадуманая стратэгія, рацыянальнае выкарыстанне матэрыялаў і правільна прынятыя рашэнні тэхнічнай службы далі магчымасць правесці рэканструкцыю гэтага аб'екта са значнай эканоміяй грашовых сродкаў".
Для аптымізацыі выгрузкі дроў, што прымяняюцца для кацельні на мясцовых відах паліва, і штучных матэрыялаў зманціраваны казлавы кран. Гэта дасць магчымасць зменшыць затраты пры выгрузцы і адысці ад выкарыстання наёмнай тэхнікі, растлумачыў кіраўнік прадпрыемства.-0-
